Мадридын “Атлетико” багийн Норвегийн довтлогч Александер Сёрлот өчигдөр болсон Испанийн аварга шалгаруулах тэмцээний 35 дугаар тойргийн тоглолтын үеэр ердөө 30 минутын дотор дөрвөн гоол оруулж, түүхэн амжилт тогтоолоо. Тус тоглолтод “Атлетико” баг “Реал Сосьедад”-ыг талбайдаа 4:0-ээр бутниргэсэн байна.

Сёрлот анхны гоолоо 7 дахь минутад, дараа нь 10, 11 болон 30 дахь минутад дараалан гоол оруулсан бөгөөд эхний ба гурав дахь гоолуудын хооронд ердөө 3 минут 57 секунд өнгөрсөн нь Испанийн аварга шалгаруулах тэмцээний түүхэнд хамгийн богино хугацаанд хийсэн хет трик болж бүртгэгдлээ.

Өмнө нь энэ амжилтыг 1995 онд “Депортиво” багийн довтлогч Бебето 4 минут 43 секундэд хет трик хийж тогтоосон байдаг. Мөн Сёрлот тоглолт эхэлснээс хойш хамгийн богино хугацаанд 3 гоол оруулсан тоглогч болж, 1941 онд Эдмундо Суарес 15 минутын дотор 3 гоол оруулж байсан рекордыг давж гарлаа.

Сёрлот энэ улиралд Испанийн аварга шалгаруулах тэмцээний 32 тоглолтод оролцож, нийт 17 гоол оруулаад байна.

Энэ удаагийн ялалтаар “Атлетико” баг 70 оноотой болж хүснэгтийн 3 дугаарт бичигдэж байгаа бол “Реал Сосьедад” баг 43 оноотойгоор 12 дугаар байр руу ухарлаа.

Дараагийн тойрогт “Атлетико” тавдугаар сарын 15-нд “Осасуна” багийн талбайд зочлон тоглох бол “Реал Сосьедад” баг “Сельта”-г талбайдаа хүлээн авч тоглоно.

Эх сурвалж: ТАСС