Дорноговь аймгийн Сайншанд суманд тавдугаар сарын 12-нд болсон Говийн бүсийн зөвлөлийн анхдугаар хуралдаанаар говийн бүсийг аж үйлдвэрийн төрөлжсөн бүс бөгөөд ногоон эрчим хүчний дэд бүс болгон хөгжүүлэх зорилт дэвшүүллээ. Уг хуралдаанаар бүсийн хэмжээнд тулгамдсан асуудлуудыг шийдвэрлэх хүрээнд дөрвөн үндсэн чиглэлээр 33 төсөл, арга хэмжээг улс болон орон нутгийн төсвийн санхүүжилтээр хэрэгжүүлэх шийдвэр гаргасан байна.

Бүсийн хөгжлийн бодлогыг боловсруулахдаа Говьсүмбэр, Дорноговь, Өмнөговь, Дундговь аймгуудын онцлогт нийцүүлэн, “Говийн бүсийн хөгжил-2040” хөтөлбөрийг шинээр тодорхойлохоор төлөвлөжээ. Түүнчлэн бүсийн зөвлөлийн эрх зүйн орчныг бүрдүүлэх, хөрөнгө оруулалт татах, хэрэгжүүлэх төсөл, хөтөлбөрүүдийг амьдралын чанарыг дээшлүүлэхэд чиглүүлэн боловсруулах талаар ярилцсан байна.

Засгийн газрын хэрэгжүүлж буй 14 мега төслийн хүрээнд уул уурхайгаас төсвийн орлогын ихэнхийг бүрдүүлж буй говийн бүс нутгийн иргэдийн амьдралд байгалийн баялгийн үр өгөөжийг шууд хүртээмжтэй хүргэх ёстойг онцлон тэмдэглэсэн байна.

Дундговь, Говьсүмбэр аймгийг хөдөө аж ахуй, тээвэр ложистикийн төв болгон хөгжүүлэх, харин Дорноговь, Өмнөговь аймгийг аж үйлдвэрийн төв болгон түлхүү хөгжүүлэх боломжийг тодорхойлжээ.

Мөн дараах саналуудыг дэвшүүлсэн байна:

• Иргэдийг ипотекийн зээлд өргөн хамруулах

• Уул уурхайн орлогын тодорхой хувийг орон нутгийн санхүүжилтэд төвлөрүүлдэг болох

• Хилийн боомтуудад лаборатори байгуулж, хүнсний бүтээгдэхүүн, бараа импортлох үйл ажиллагааг Улаанбаатар хот руу явахгүйгээр шуурхай шийдвэрлэдэг болгох

• Улаанбаатар-Замын-Үүд чиглэлийн авто замыг засварлаж, шинэчлэх

• Ус, хөрсний доройтлыг бууруулах шийдэл боловсруулж хэрэгжүүлэх

• Сэргээгдэх эрчим хүчний төслүүдийг говийн бүсэд түлхүү хөгжүүлэх

• Уур амьсгалын өөрчлөлт, шар шороон шуургыг бууруулах, ногоон байгууламж нэмэгдүүлэх, ногооруулах төсөл хөтөлбөрүүдийг эрчимжүүлэх

Эдгээр саналуудыг Засгийн газрын хуралдаанаар хэлэлцүүлж, бодлогын түвшинд шийдвэрлэхээр төлөвлөж байгаа юм.