Дэлхийн кино урлагийн хамгийн нэр хүндтэй наадмуудын нэг болох Каннын кино наадам энэ долоо хоногт эхлэх гэж байна. Энэ удаагийн наадмын улаан хивсний ёслол хатуу хяналтын дор зохион байгуулагдах бөгөөд зохион байгуулагчид хэт задгай, нүцгэн биеийг ил гаргасан хувцаслалтыг хатуу хориглосноо албан ёсоор мэдэгдлээ.
Каннын кино наадмын 78 дахь удаагийн шагнал гардуулах ёслолын өмнөхөн хувцаслах дэг жаягийг шинэчлэн баталж, “Улаан хивсний ёслол болон наадмын бусад арга хэмжээний үеэр нүцгэн биеийг ил гаргах, нэвт харагддаг хувцас өмсөхийг хориглоно” хэмээн онцолжээ. Сүүлийн жилүүдэд олны анхаарал татсан нэвт харагддаг, хэт задгай хувцаслалт трэнд болоод байсан нь ийм арга хэмжээ авахад хүргэсэн байна.
Каннын хэвлэлийн төлөөлөгчид энэ талаар тайлбарлахдаа, “Энэхүү журам нь зөвхөн гоёлын хувцаслалтыг зохицуулах бус, наадмын нийт дүрэм журам, Францын хууль тогтоомжийн хүрээнд хүндэтгэлтэй, соёлтой оролцоог хангуулах зорилготой” гэжээ. Түүнчлэн улаан хивсний ёслолын үеэр зочид нааш цааш чөлөөтэй хөдлөх, суудалдаа саадгүй суух боломжийг хангах үүднээс нүсэр, том хэмжээтэй хувцас, хэт их чимэглэлтэй гоёл хэрэглэхийг мөн хориглож байгааг анхааруулсан байна.
Каннын кино наадам мягмар гарагт албан ёсоор нээлтээ хийх бөгөөд энэхүү шинэ журам наадмын улаан хивсний өнгө төрх, соёлын хэм хэмжээнд тодорхой өөрчлөлт авчрах хүлээлттэй байна.
Эх сурвалж: AP News
