Монгол Улсаас “Энэрэл” мэргэжлийн боловсролын сургуулийн сургалтын менежер А.Уянга Тайландын Эрхэмсэг гүнж Маха Чакригийн нэрэмжит нэр хүндтэй шагналд нэр дэвшсэн байна. Тус шагнал нь боловсролын салбарт тууштай ажиллаж, хүүхдийн амьдралд бодитой эерэг нөлөө үзүүлсэн шилдэг багш нарыг алдаршуулж, тэдний мэргэжлийн хөгжлийг дэмжих зорилготой юм.
Энэхүү нэр хүндтэй шагналыг Тайландын Эрхэмсэг гүнж Маха Чакригийн 60 насны ойг тохиолдуулан 2015 оноос эхлэн хоёр жил тутам Зүүн Өмнөд Азийн орнууд болон Тимор-Лестед олгож ирсэн бөгөөд 2025 оноос эхлэн шагналын хамрах хүрээг өргөжүүлж, анх удаа Бангладеш, Бутан, Монгол Улс багтсан онцлогтой байна.
А.Уянга нь боловсролын салбарт идэвх зүтгэлтэй, хүүхэд бүрийн төлөө сэтгэл гарган ажиллаж ирсэн бөгөөд түүний энэхүү үйлс нь олон улсын хэмжээнд үнэлэгдэж, Эрхэмсэг гүнжийн нэрэмжит шагналын эзнээр тодорч байгаа юм. Тэрбээр шагналаа энэ оны аравдугаар сарын 15-нд Тайланд улсад болох ёслолын арга хэмжээний үеэр гардан авах юм.
Мөн энэ үйл явдалтай холбоотойгоор Боловсролын яамны Төрийн нарийн бичгийн дарга Х.Батжаргал болон Эрхэмсэг гүнжийн нэрэмжит шагналын сангийн дарга доктор Криссанапон Киртикара тэргүүтэй төлөөлөгчид манай улсад айлчлах үеэрээ “Энэрэл” мэргэжлийн боловсролын сургууль болон Тайландын ивээл дор төсөл хэрэгжүүлсэн сургуулиудын үйл ажиллагаатай танилцсан талаар Боловсролын яам мэдээлжээ.
Эх сурвалж: Боловсролын яам
