Завхан аймгийн Солонготын даваанд өнөөдөр цас их хэмжээгээр орсны улмаас зам халтиргаа гулгаатай, үзэгдэх орчин хязгаарлагдсан тул иргэдэд онцын шаардлагагүй тохиолдолд энэ чиглэлд зорчихгүй байхыг анхааруулж байна.
Аймгийн ихэнх нутгаар цас орж, цаг агаарын нөхцөл хүндрээд байгаа бөгөөд Солонготын даваа орчимд замын нөхцөл хүндэрч, тээврийн хэрэгсэл зорчиход хүндрэл учирч байгаа юм. Завхан аймгийн Онцгой байдлын газраас мэдээлснээр, тус даваанд “Завхан АЗЗА” ХХК-аас 1 механизм, 2 үйлчилгээний машин, 7 ажилтан ажиллаж, замыг хусаж цэвэрлэх ажиллагаа явуулж байна.
Иргэд болон тээвэрчдэд дараах зөвлөмжийг хүргэж байна:
-
Өвлийн дугуйтай, бүрэн бүтэн тээврийн хэрэгслээр зорчих
-
Дулаан хувцас, шаардлагатай хэрэгсэлтэй замд гарах
-
Боломжтой бол Солонготын давааны чиглэлд зорчихоос түр татгалзах
Хүнд нөхцөлтэй энэ үед анхаарал болгоомжтой зорчиж, болзошгүй осол, зогсолтоос сэргийлэхийг холбогдох албаныхан зөвлөж байна.
Эх сурвалж: Завхан аймгийн Онцгой байдлын газар
