Аж үйлдвэр, эрдэс баялгийн сайд Ц.Туваан Дорноговь аймагт зохион байгуулагдаж буй Говийн бүсийн зөвлөлийн анхдугаар хуралдааны үеэр тус аймгийн нутаг дэвсгэрт үйл ажиллагаа явуулж буй БНХАУ-ын хөрөнгө оруулалттай Доншен газрын тос (Монгол) ХХК-ийн удирдлагуудтай уулзаж, газрын тосны олборлолт, ашиглалтын үйл ажиллагааны талаар санал солилцлоо.

Уулзалтын үеэр сайд Ц.Туваан Монгол Улсад баригдаж буй Газрын тос боловсруулах үйлдвэрийг 2028 онд ашиглалтад оруулахаар төлөвлөж буйг онцлон, тус үйлдвэрт бүтээгдэхүүн нийлүүлэх чиглэлд хамтран ажиллах санал тавьсан байна. Тус боловсруулах үйлдвэр нь Доншен компанийн үйл ажиллагаа явуулж буй талбайгаас ойролцоогоор 60 орчим километрийн зайд байрлаж байгаа бөгөөд энэ нь тээвэр логистикийн хувьд томоохон давуу тал болохыг онцолжээ.

Доншен газрын тос (Монгол) ХХК нь Монгол Улсын Засгийн газрын 1997 оны тогтоолоор баталсан Бүтээгдэхүүн хуваах гэрээний дагуу 2003 онд байгуулагдсан бөгөөд БНХАУ-ын 100 хувийн хөрөнгө оруулалттайгаар газрын тосны хайгуул, олборлолтын чиглэлээр үйл ажиллагаа эрхэлж ирсэн. Өнгөрсөн хугацаанд хайгуул, үнэлгээний 132 өрөмдлөгийн цооног гаргаж, нийт 367.4 сая ам.долларын хөрөнгө оруулалт хийсэн байна.

Хийсэн судалгаагаар газрын тосны баталгаат нөөц 26.05 сая тонн буюу 186.3 сая баррель, үүнээс ашиглалтын баталгаат нөөц нь 2.07 сая тонн буюу 14.86 сая баррель гэж тогтоогджээ. Гэрээт талбайгаас өнөөдрийн байдлаар нэг сая тонн газрын тос олборлож, БНХАУ-д экспортолсон тухай компанийн удирдлагууд мэдээлэл өгсөн байна.

Цаашид газрын тос боловсруулах үйлдвэрийн үйл ажиллагааг дэмжих, дотоодын хэрэгцээг хангах чиглэлээр хамтын ажиллагааг өргөжүүлэх боломжтойг талууд онцлон тэмдэглэж, цаашдын хамтын ажиллагааны хүрээнд тодорхой төлөвлөгөө боловсруулах талаар санал солилцсон байна.

Эх сурвалж: Аж үйлдвэр, эрдэс баялгийн яам