Монголын үндэсний бөхийн холбооноос энэ улирлаас эхлэн бөхчүүдийн амжилтыг чансааны оноогоор үнэлж эхэлсэн бөгөөд өнөөдрийн байдлаар 500 бөх эрэмбэлэгдээд байна. Намрын барилдааны нээлтээс хойш нийт 30 барилдаан зохион байгуулагдаж, хамгийн сүүлд энэ сарын 11-нд болсон арслан цолны хүндэтгэлийн барилдаанд гурав давж 300 оноо авсан Ховд аймгийн Зэрэг сумын харьяат, улсын заан Б.Бат-Өлзий анх удаа чансааг тэргүүлж эхэлжээ.

Б.Бат-Өлзий 30 барилдаанаас 21-д нь зодоглож, есөн барилдаанд өнжсөн ч нийт 9150 оноо цуглуулсан амжилтаараа бусдыгаа манлайлж байна. Тэрбээр энэ хугацаанд хоёр удаа түрүүлж, нэг удаа үзүүрлэн, таван удаа их шөвөгт, дөрвөн удаа наймд шалгарсан амжилт гаргажээ.

Харин Баянхонгор аймгийн Жинст сумын харьяат, улсын начин Э.Батмагнай 8900 оноогоор удаах байрт бичигдэж байна. Өмнөх тэргүүлэгч улсын аварга О.Хангай дөрөвдүгээр сарын 26-наас хойш өргөөнд барилдаагүйгээс шалтгаалан дөрвөн долоо хоногийн дараа тэргүүн байр сууриа алджээ. Энэ нь түүний хувьд чансааны тэргүүлэгчийн байрлалаа хоёр дахь удаагаа алдаж буй тохиолдол юм.

Түүнчлэн улсын начин Ч.Батчулуун 8200, улсын заан М.Лхагвагэрэл 7950 оноогоор эхний тавд эрэмбэлэгдэж байна. М.Лхагвагэрэл заан дөрөвдүгээр сарын 19-нөөс хойш барилдаанд оролцоогүй бөгөөд шигшээ багийн нэгдсэн бэлтгэлд хамрагдаж, өдгөө Дагестанд хамтарсан бэлтгэл хийж байгаа аж.

Шилдэг 10-т багтсан бусад бөхчүүдийн хувьд улсын арслан Ц.Бямба-Отгон, Б.Орхонбаяр, заан Д.Хүдэрбулга, аймгийн хурц арслан Н.Өсөхбаяр, Д.Алтанцоож нарын нэрс багтжээ. Чансааны онооны шинэчлэл нь бөхчүүдийн идэвх, барилдааны үр дүнг илүү бодитой үнэлэх боломжийг бүрдүүлж байгааг ажиглагчид онцолж байна.

Эх сурвалж: Монголын үндэсний бөхийн холбоо