ХААИС-ийн Агроэкологийн сургуулийн багш, оюутнууд “Тэрбум мод” үндэсний хөдөлгөөнд идэвхтэй нэгдэн, тогтвортой ногоон ирээдүйн төлөөх их үйлсэд бодитой хувь нэмрээ орууллаа. Тэд Баянчандмань дахь Мод үржүүлгийн газарт тарьж ургуулсан 40,500 ширхэг нарсны тарьцаар Сэлэнгэ аймгийн Тужийн нарсны байгалийн цогцолборт газрын 15 га талбайд ойжуулалтын ажил амжилттай гүйцэтгэсэн байна.

Энэхүү ойжуулалтын ажил “Тэрбум мод” сангийн дэмжлэгтэйгээр хэрэгжиж байгаа бөгөөд оюутан залуус зөвхөн мод тарих бус ойжуулалтын талаар онолын мэдлэгээ практикт хэрэгжүүлэн, байгаль орчны нөхөн сэргээлтийн ажилд гарамгай оролцсон нь онцлог юм.

Мөн Сэлэнгэ аймгийн Байгаль орчны газар, Бэлчир бүсийн сум дундын Ойн ангийн ойн инженерүүд ойжуулалтын ажлыг мэргэжлийн арга зүйгээр хангаж, "Ивцэг ой" ХХК-ийн ойн инженер О.Отгонбат хөрс боловсруулалт, шан татах ажлыг хариуцан гүйцэтгэсэн байна. Тужийн нарсны байгалийн цогцолборт газрын хамгаалалтын захиргааны мэргэжилтэн Хишигт газар дээр нь мэргэжил арга зүй, зохион байгуулалтын дэмжлэг үзүүлж, оролцогчдод байрлах байр, нөхцөл боломжийг бүрдүүлсэн нь ойжуулалтын ажлыг үр дүнтэй зохион байгуулахад чухал хувь нэмэр болсон байна.

Тус сургуулийн хамт олны энэ ажил нь залуу үед экологийн боловсрол олгох, байгальд ээлтэй хандлагыг төлөвшүүлэх, үндэсний хэмжээнд хэрэгжиж буй ногоон хөгжлийн бодлогыг дэмжих чухал алхам боллоо.

Эх сурвалж: ХААИС-ийн Агроэкологийн сургууль, Сэлэнгэ аймгийн Байгаль орчны газар