Говь-Алтай аймгийн ерөнхий боловсролын сургуулийн ахлах ангийн сурагчдын дунд зохион байгуулсан аймгийн Засаг даргын нэрэмжит цэрэг-спортын “Дөл-2025” цогцолбор тэмцээн амжилттай болж өндөрлөлөө. Энэ удаагийн тэмцээн “Эх оронч Монгол-Их сэргэлтийн жил”-ийн хүрээнд хоёр үе шаттайгаар зохион байгуулагдсан бөгөөд эхний шат нь дөрөвдүгээр сард сумдын хэмжээнд болж, шилдгүүдээ шалгаруулсан юм. Аймгийн аварга шалгаруулах хоёрдугаар шатны тэмцээнийг өнгөрсөн амралтын өдрүүдэд амжилттай зохион байгуулж, шилдэг тасгууд тодорлоо.
Тэмцээний тэргүүн байрыг Халиун сумын ерөнхий боловсролын сургуулийн Ж.Мягмарсүрэн захирагчтай “Оргил” тасаг эзэлж, шилдгээр шалгарсан байна. Хоёрдугаар байрт Тонхил сумын ЕБС-ийн Т.Батбилэг захирагчтай “Алтан соёмбо” тасаг, гуравдугаар байрт Есөнбулаг сумын ерөнхий боловсролын гуравдугаар сургуулийн О.Тамираа захирагчтай “Дөл” тасаг шалгарчээ.
Хоёр өдрийн турш үргэлжилсэн энэхүү тэмцээнд аймгийн 10 сургуулийн 130 гаруй баг, тамирчид жагсаалын үзүүлэх тоглолт, гардан тулааны үзүүлбэр, гэрийн даалгавар, маршийн гүйлтийн тэмцээн зэрэг олон төрлөөр авхаалж самбаа, хурд хүчээ сорьж, эх оронч үзэл санааг түгээсэн амжилттай арга хэмжээ болж өнгөрлөө.
