Нийслэлийн Засаг даргын нэгдүгээр орлогч Т.Даваадалай, “Сэлбэ 20 минутын хот корпорац” ХХК-ийн удирдлага, Монголын барилгын үндэсний ассоциаци болон Монголын барилгачдын нэгдсэн холбооны төлөөлөлтэй уулзалт хийж, 24 мега төсөлд дотоодын үйлдвэрлэгч компаниудын оролцоог нэмэгдүүлэх, хамтран ажиллах талаар санал солилцлоо.
Уулзалтын үеэр НЗД-ын нэгдүгээр орлогч Т.Даваадалай хэлэхдээ, “Мега төслүүдэд дотоодын компаниудын оролцоог нэмэгдүүлэхэд шаардлагатай хууль, эрх зүйн орчныг сайжруулна. Мөн дотоодын үйлдвэрлэгчидтэй хамтран залуу инженерүүдийг дэмжих, хүний нөөцийг бэлтгэх, соён гэгээрүүлэх компанит ажил зохион байгуулна” хэмээн онцоллоо.
Түүнчлэн уулзалтаар мега төслүүдэд дотоодын үйлдвэрлэгчдийг дэмжих, хамтарч ажиллах санамж бичиг байгуулах шийдвэрт хүрч, цаашдын хамтын ажиллагааг бэхжүүлэхээр тохиролцсон байна. Энэ нь дотоодын аж ахуйн нэгжүүдийн үйлдвэрлэл, бүтээгдэхүүн үйлчилгээний өрсөлдөх чадварыг нэмэгдүүлэх, үндэсний барилгын салбарын хөгжилд чухал түлхэц болох юм.
Эх сурвалж: НЗДТГ
