Сагсан бөмбөгийн Азийн аваргуудын лигийн тэмцээн Улаанбаатар хотын “М банк арена”-д үргэлжилж байна. Монголын лигийн аварга “Хасын Хүлэгүүд” баг “В” хэсгийн дөрөв дэх тоглолтоо Тайванийн “Кингс” багтай хийж, 94:73-ын харьцаатай хожлоо. Энэ ялалтаар “Хүлэгүүд” дөрвөн дараалсан хожилтойгоор хэсгээ тэргүүлж байна.

Тус тоглолтод Монголын багийн гол тоглогч Ян Миллер 23 оноогоор багаа тэргүүлсэн бол Жордан Толберт 16, Ч.Ихбаяр 14, Д.Мөнхтүвшин 13, Б.Барсболд 12, А.Азбаяр есөн оноо авч, багийн хожилд чухал хувь нэмэр орууллаа. Мөн Жорди Тшиманга тав, О.Сэргэлэн хоёр оноо авч, багаа дэмжжээ. “Хасын Хүлэгүүд” баг маргааш “Эйдройт” багтай, нөгөөдөр Тайландын “Хай Тех” багтай тоглоно.

Харин “Бишрэлт Металл” баг тав дахь тоглолтдоо Тайванийн “Таоюань Пайлотс” багт 63:85-аар хожигдож, дөрөв дараалан ялагдаад байна. Тэд “А” хэсгийн хүснэгтэд 1 хожил, 4 хожигдолтойгоор бичигдэж байгаа бөгөөд маргааш сүүлийн тоглолтоо Индонезийн “Пелита Жаяа” багтай хийхээр төлөвлөжээ.

Эх сурвалж: Азийн аваргуудын лигийн албан ёсны мэдээ