Сүхбаатар дүүргийн төсвийн хөрөнгө оруулалтаар 19 дүгээр хороонд байрлах Шарга морьт, Хандгайтын авто замын уулзварт цагдаагийн хяналтын постын барилга баригдаж, өнөөдрөөс ашиглалтад орлоо. Энэхүү пост нь замын хөдөлгөөний аюулгүй байдлыг хангах, осол, гэмт хэрэг, зөрчлөөс урьдчилан сэргийлэх, авто замын байнгын хяналтыг сайжруулах чухал ач холбогдолтой юм.
Тус барилга нь зоорьгүй нэг давхар бүтэцтэй бөгөөд оффис, уулзалтын өрөө, ариун цэврийн байгууламж, дулааны узелийн өрөөтэй. Гадна талбайд ногоон байгууламж бий болгож, эрчим хүчний хэмнэлттэй нарны зайн хураагуур бүхий гэрэлтүүлэг суурилуулсан байна. Мөн автомашины зогсоол, явган хүний замыг шинэчлэн тохижуулж, иргэдийн ая тухтай, аюулгүй зорчих нөхцөлийг бүрдүүлжээ.
Шинээр ашиглалтад орсон хяналтын пост нь тус бүсийн хөдөлгөөний урсгалыг хянах, замын хөдөлгөөний ачааллыг бууруулах, зам тээврийн ослын тоог багасгах, гэмт хэрэг, зөрчлийг таслан зогсооход бодит үр нөлөө үзүүлэх хүлээлттэй байна.
Эх сурвалж: Сүхбаатар дүүргийн ЗДТГ
