Украин, Оросын төлөөлөгчдийн шууд хэлэлцээ тавдугаар сарын 15-нд Туркийн Истанбул хотод болох гэж буйтай холбоотойгоор Украины Ерөнхийлөгч Володимир Зеленский АНУ-ын Ерөнхийлөгч асан Дональд Трампыг энэхүү уулзалтад оролцуулах саналыг дэмжиж байгаагаа илэрхийллээ. Тэрбээр даваа гаргийн орой өөрийн “Telegram” сувагт бичихдээ, “Мэдээж, Туркт болох энэ уулзалтад Ерөнхийлөгч Трамп бидэнтэй хамт байхыг бүх украинчууд хүсэж байна. Энэ бол зөв санаа. Бид олон зүйлийг өөрчилж чадна” хэмээн онцолсон байна.

Зеленский өмнө нь АНУ-ын Ерөнхийлөгчийн санал болгосон “урьдчилан болзолгүйгээр гал зогсоох” санаачлагыг дэмжиж байгаагаа мэдэгдсэн. Тэрбээр мөн “Уулзахад бэлэн гэдгээ би ил тод хэлсэн. Би Туркт очно. Оросын тал энэ уулзалтад оролцоно гэж найдаж байна. Украин өөрийн талаас гал зогсооход бэлэн байна” хэмээн мэдэгдлээ.

Оросын Ерөнхийлөгч Владимир Путин урьдчилан ямар нэгэн нөхцөл тавихгүйгээр Истанбулд шууд хэлэлцээ хийх саналыг тавьсан ч, Европын орнууд болон АНУ-ын уриалсан 30 хоногийн хугацаатай гал зогсоох саналыг хүлээн аваагүй хэвээр байна. Украины удирдагч энэ талаар “Би пүрэв гарагт Туркт Путинийг биечлэн хүлээх болно. Энэ удаа Оросын тал ирж чадахгүй гэсэн шалтгаан хайхгүй гэж найдаж байна” хэмээн өмнө нь онцолж байжээ.

Кремлийн зүгээс Зеленскийн мэдэгдэлд албан ёсны хариу өгөөгүй байгаа ч АНУ-ын Ерөнхийлөгч асан Дональд Трамп хэлэлцээ болох өдөр Истанбулд биечлэн очиж магадгүй хэмээн мэдэгдсэн нь олон улсын анхаарлыг татаж байна.

Эх сурвалж: DW, AP