АНУ-ын Трампын засаг захиргаа Өмнөд Африкийн 59 цагаан арьст иргэнийг “дүрвэгсэд”-ийн статустайгаар хүлээн авсан талаар AP агентлаг мэдээлэв. Энэ үйл явдал АНУ-ын Цагаан ордон хууль бус цагаачдыг олноор нь албадан гаргаж, цагаачлалын хатуу бодлого хэрэгжүүлж буй үед болсон нь олон нийтийн анхаарлыг татаж, маргаан дэгдээгээд байна.
АНУ-ын Төрийн нарийн бичгийн даргын орлогч Кристофер Ландау эдгээр иргэдтэй уулзахдаа, “Эрх чөлөөний оронд тавтай морил. Та бүгдийг бид тааламжтайгаар хүлээн авч байна. Сүүлийн жилүүдэд туулсан зовлонг тань ойлгож байна” хэмээн мэдэгдсэн байна. Тэд АНУ-ын далбаа барьсан африканеруудын бүлэг байсан бөгөөд тусгай захиалгат нислэгээр Вашингтон хотноо иржээ. Уг нислэгийн зардлыг АНУ-ын Төрийн департамент бүрэн хариуцсан бөгөөд тэдгээр иргэд цааш Америкийн янз бүрийн хотууд руу тархан суурьшсан байна.
Африканерууд нь голланд, герман, франц гаралтай цагаан арьст цөөнх бөгөөд Өмнөд Африкт апартеидын дэглэмийн үед эрх мэдлийг атгаж, өнгөт арьст иргэдийг олон жилийн турш хэлмэгдүүлж байсан түүхтэй.
АНУ-ын Ерөнхийлөгч Дональд Трамп саяхан хийсэн мэдэгдэлдээ Өмнөд Африкийн цагаан арьст тариаланчид “геноцид”-д өртөж, амь насаа алдаж байна хэмээн дахин мэдэгдсэн нь олон улсын түвшинд маргаан дагуулсан юм. Ийм агуулгатай үзэл суртал хэт барууны үзэлтнүүдийн дунд өргөн дэлгэрсэн бөгөөд Трампын мэдэгдэл үүнд шууд нөлөөлсөн гэж ажиглагчид үзэж байна.
Гэсэн хэдий ч Өмнөд Африкт гарч буй гэмт хэргийн статистик мэдээллээр, тус улсад хүчирхийлэл ихээр гардаг хэдий ч цагаан арьст иргэд олноороо халдлагад өртөж байгаа гэх үндэслэлгүй мэдэгдэл бодит байдлыг гуйвуулсан гэж үзэж байна. ӨАБНУ-ын Гадаад хэргийн сайд Рональд Ламола энэ талаар байр сууриа илэрхийлэхдээ, цагаан арьст тариаланчид бусад иргэдийн адил гэмт хэргийн золиос болж байгаа төдийгүй тус улсад арьс өнгөөр ялгаварласан ямар нэг бодлого байхгүй хэмээн няцаасан байна.
Энэ асуудал нь АНУ-ын цагаачлалын бодлогын давхар дотоод зөрчил, улс төрийн хагарал, хэт барууны үзэл санааны нөлөөг дахин хүчтэй харуулж буй үйл явдал боллоо.
Эх сурвалж: AP News
