Монголын өвлийн аялал жуулчлалыг хөгжүүлэх гол арга хэмжээний нэг болох “Хөх сувд” мөсний баяр энэ жил Хөвсгөл нуурын мөсөн дээр, Хатгал суманд гуравдугаар сарын 2-4-нд зохион байгуулагдана. Энэхүү баяр анх 2000 онд Хөвсгөл нуурыг хамгаалах, орон нутгийн иргэдийн оролцоог нэмэгдүүлэх зорилгоор байгаль орчны байцаагчид Д.Лхагвацогт, Ж.Төмөрсүх нарын санаачилгаар “Сантын өвөр” хэмээх газарт морин чарганы уралдаантайгаар эхэлж байжээ. Түүнээс хойш жил бүр уламжлал болон өргөжин, 2001 оноос эхлэн улсын хэмжээний арга хэмжээнд тооцогдож байна.
Сүүлийн жилүүдэд 20 мянга орчим жуулчин, иргэд оролцдог тус баярт Япон, Солонгос, Герман, АНУ зэрэг олон улсын төлөөлөгчид хүрэлцэн ирдэг уламжлалтай. Мөсний баярын үеэр мөсөн шагай, тэшүүр, унадаг дугуйн уралдаан, нохой чарга, олс таталт, “Аав, ээж, би” тэмцээн, бөөгийн тахилга, урлагийн тоглолт зэрэг олон сонирхолтой арга хэмжээ зохион байгуулагддаг юм.

Эх сурвалж: Хөвсгөл аймгийн ЗДТГ.