Японд энэ оны эхний зургаан сард мэндэлсэн хүүхдийн тоо өмнөх оны мөн үеийнхээс 0.4 хувиар өсөж, 320 458-д хүрсэн байна. Ингэснээр эхний хагас жилийн үзүүлэлтээр төрөлт сүүлийн 11 жилд анх удаа нэмэгдсэнийг Засгийн газрын лхагва гаригт танилцуулсан мэдээлэл харуулжээ.
Төрөлт ийнхүү нэмэгдэхэд 2024, 2025 онд гэрлэлтийн тоо өссөн нь нөлөөлсөн байж магадгүй гэж мэргэжилтнүүд үзэж байна. Гэрлэлт нь төрөлтийн тоонд нөлөөлдөг гол хүчин зүйлсийн нэг юм.
Гэсэн хэдий ч энэ онд мэндлэх хүүхдийн тоо өнгөрсөн оны үзүүлэлттэй /671 270/ ойролцоо байх төлөвтэй байна. Өнгөрсөн онд Японд мэндэлсэн хүүхдийн тоо дараалан 10 дахь жилдээ түүхэн доод түвшинд хүрсэн билээ.
Японы Эрүүл мэнд, хөдөлмөр, нийгмийн хамгааллын яамны статистик мэдээллээр, тус улсад 1973 онд төрөлт 2.09 саяд хүрснээс хойш зарим жилд хэлбэлзсэн ч ерөнхийдөө буурсаар иржээ. Засгийн газраас энэ хандлагыг өөрчлөхийн тулд олон арга хэмжээ авч хэрэгжүүлсэн байна.
Японы Хүн ам, нийгмийн хамгааллын судалгааны үндэсний хүрээлэн 2023 онд гаргасан тооцоололдоо жилийн төрөлтийн тоо 2040 он гэхэд 680 мянгаас доош буурна гэж таамаглаж байжээ. Гэвч бодит үзүүлэлтээс харахад төрөлтийн бууралт урьдчилан тооцоолсноос илүү хурдацтай явагдаж байна.
Тус улсын Засгийн газар төрөлтийг нэмэгдүүлэх зорилгоор хүүхэд асарсны тэтгэмжийг нэмэх, хүүхэд асрах чөлөөний чөлөөний хугацаанд мөнгөн тэтгэмж олгох зэрэг арга хэмжээ хэрэгжүүлж эхэлжээ. Үүний зэрэгцээ эрх баригчид 2030-аад оны эхэн үе хүртэлх хугацааг төрөлтийн хямралыг даван туулах "сүүлийн боломж" гэж үзэж байна.
Kyodo
