Төр, хувийн хэвшлийн түншлэлийн тухай хуулийн дагуу Монгол Улсад анх удаа хэрэгжиж буй “Хог шатааж эрчим хүч гаргах үйлдвэр”-ийн түншлэлийн гэрээнд өнөөдөр гарын үсэг зурлаа. Гэрээг Нийслэлийн Засаг дарга бөгөөд Улаанбаатар хотын Захирагч Х.Нямбаатар, Хятадын “Рэншоу Сычуань эрчим хүчний хөрөнгө оруулалт, байгаль орчныг хамгаалах ХХК”-ийн ТУЗ-ын дарга Танг Яа Ү нар байгуулсан юм.

Нийслэлийн Засаг дарга Х.Нямбаатар “Улаанбаатар хотод өдөрт 1500 тонн орчим хог хаягдал үүсдэг. Үүнийг шатааж дулаан, цахилгаан үйлдвэрлэх энэхүү үйлдвэр нь хогийн цэгийн асуудлыг шийдэхийн зэрэгцээ экологийн чухал ач холбогдолтой” хэмээн онцлов. Тэрээр “1 кВт эрчим хүчийг 14 центээр үнэлж, 8.4 центээр Эрчим хүчний яаманд худалдах бөгөөд 5.6 центийн зөрүүг их хэмжээний хог гаргадаг аж ахуйн нэгжүүдийн төлбөрөөс нөхөн санхүүжүүлнэ” гэж тайлбарлав.

“Urban mining” буюу хогийн цэгийн булсан хогийг ухаж дахин ашиглах ойлголтыг Монголд нэвтрүүлэх тус төсөл нь зөвхөн нийслэлийн төдийгүй Төв аймгийн Зуунмод, Хүннү хот, Алтанбулаг, Сэргэлэн сумдын хогийг үнэ төлбөргүй шатааж, байгаль орчныг цэвэрлэх ач холбогдолтой гэж хотын Захирагч онцоллоо.

Өдөрт 1500 тонн хог шатаах хүчин чадалтай тус үйлдвэрийг 206.5 сая ам.долларын хөрөнгө оруулалтаар барьж, 30 сарын хугацаанд ашиглалтад оруулан, 28 жилийн дараа төрд шилжүүлэх юм. Үйлдвэр жилд 8000 цаг ажиллаж, 35 мВт цахилгаан эрчим хүч үйлдвэрлэх төлөвтэй байна.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс.