Цаг уур, орчны шинжилгээний газрын мэдээлснээр, энэ оны аравдугаар сарын 11-20-ны хооронд агаарын дундаж температур -4.9 градус байжээ. Энэхүү үзүүлэлт нь олон жилийн дунджаас 6.9 градусаар хүйтэн байгаа бөгөөд 1981 оноос хойших хамгийн хүйтэн 10 хоногийн хугацаа болсон байна.

Ердийн жилд энэ үед агаарын дундаж температур +2 градус орчим байдаг бол энэ жил эрс хүйтэрч, ихэнх нутгаар богино хугацаанд хүчтэй жавартай өдрүүд давамгайлсан байна. ЦУОШГ-аас гаргасан температурын тархалтын зурагт нутгийн баруун болон төвийн хэсгээр температур хамгийн их буурсан нь тодорхой харагдаж байгаа юм.

Мэргэжлийн байгууллагууд цаг агаарын эрс өөрчлөлт, уур амьсгалын хандлагын шинжилгээг үргэлжлүүлэн хийж буй бөгөөд ирэх саруудад хүйтний эрч аажмаар нэмэгдэх төлөвтэйг анхааруулжээ.

Эх сурвалж: Цаг уур, орчны шинжилгээний газар.