Эверест зэрэг Балбын уулс дэлхийн өнцөг булан бүрээс уулчдыг татсаар ирсэн боловч сүүлийн үед зэлүүд буйд газрыг мэдрэх, оргилд түрүүлж гарах боломж бүхий нууцлаг оргилуудад гарах уулчдын тоо нэмэгдэх болжээ.

Хималайн нурууны тус улсад дэлхийн хамгийн өндөр 10 оргилын найм нь байдаг бөгөөд жил бүр олон зуун уулчныг хүлээн авдаг тул уулын спорт ашигтай бизнесийн нэгд тооцогддог. Эверест болон 8000 м-ээс дээш өндөр бусад ууланд авирах хүсэлтэй хүмүүс давамгайлдаг боловч шинэ үеийн адал явдал хайгчид Балба дахь тоо томшгүй олон 6000, 7000 м-ийн оргилуудыг сонирхох болжээ. Тус улсад авирах боломжтой 462 оргил байдгаас зуу орчимд нь хүн гарч байгаагүй ажээ.

Францын уулчин, экспедицийн ахлагч Пауло Гробель “Франс Пресс” агентлагт хэлэхдээ, хэрэв та авирах оргилынхоо зөвхөн өндөрт нь анхаарал хандуулж байгаа бол авирах уулсын тоо хязгаарлагдмал байх болно, харин 7900 м-ийн өндөр уулсад авирахыг сонирхож байвал маш их боломж бий. 6900 м бол бүр ч олон оргил таныг хүлээж байна хэмээн ярилаа.

Энэ намар Балбын эрх баригчид авиралтын 1323 зөвшөөрөл олгосон байна. Ихэнх уулчдын хувьд алдартай оргилуудад гарах арилжааны томоохон экспедицүүдийн нэг хэсэг байдаг бол жижиг бие даасан багууд алслагдсан, төдийлөн танил бус уулсыг зорьдог байна. Тэдгээр экспедицийн ихэнх нь, түүний дотор Франц, Япон, Швейцарын багуудын хувьд бага дэмжлэгтэйгээр, нэмэлт хүчилтөрөгчгүйгээр, цөөн тоног хэрэгсэлтэйгээр гарч байгаа ажээ.

Балбын оргилуудын ихэнх нь логистикийн хувьд хүрэх боломжгүй хэвээр байгаа нь авирахад хэтэрхий хэцүү учраас биш, харин хэт алслагдмал оршдогтой холбоотой байна. Уулчдын хувьд төдийлөн танил бус оргилуудыг сурталчлахын тулд Балбын эрх баригчид энэ оны наймдугаар сард 97 ууланд авирах хураамжийг чөлөөлсөн юм. Балбын Аялал жуулчлалын газрын уулын авиралтын хэсгийн ахлагч Хималь Гаутамын хэлснээр, уулчид 8000 м-ээс доош өндөр уулсыг сонирхох нь нэмэгдэж байгаа ажээ.

Эх сурвалж: AFP