Дархан-Уул аймгийн хүнс, хөдөө аж ахуйн газраас аймгийн ИТХ-ын дарга А.Янжмаа болон Байгаль орчин, хөдөөгийн хөгжлийн хорооны төлөөлөгчдөд цаг үеийн болон өвөлжилт, хаваржилтын бэлтгэлийн явцыг танилцууллаа. Танилцуулгаар хөдөө аж ахуйн салбарын төлөвлөгөөт ажлуудын гүйцэтгэл 84.3 хувьд хүрсэн байна. Өвөлжилт, хаваржилтын бэлтгэл хангах хүрээнд төлөвлөсөн 16 ажлаас гурав нь бүрэн биелсэн бол найм нь 80-90 хувийн гүйцэтгэлтэй байна.

Аймгийн хэмжээнд 2025-2026 онд өвөлжиж, хаваржих малын тоо 238.221 толгой буюу хонин толгойд шилжүүлбэл 612.415 толгой байна. Засгийн газрын 2024 оны 28 дугаар тогтоолын дагуу 260 тонн өвс, 130 тонн тэжээлийг аюулгүйн нөөцөд төвлөрүүлжээ. Хонгор сумын нутгаас бэлтгэдэг байгалийн хадлангийн төлөвлөгөө 52.9 мянган тонн байхаас 21.7 мянган тонныг бэлтгэсэн байна.

Өнгөрсөн долоо хоногийн байдлаар хадлан, тэжээл бэлтгэл 62.8 хувьтай байгаа бөгөөд нийт 1130.1 тонн сүрэл, 738.1 тонн ногоон тэжээл, 1055 тонн үйлдвэрийн тэжээл, 498.2 тонн гар тэжээл, 450.5 тонн дарш, 847.6 тонн давс, хужир, шүү бэлтгэгдээд байна.

Мөн ирэх онд аймгийн хүн амын махны хэрэгцээ 3878.6 тонн байх урьдчилсан тооцоо гарсан бөгөөд хаврын улиралд 680.22 тонн мах шаардлагатайгаас 300 сая төгрөгийн төсөвт 102-122 тонн нөөцийн мах бэлтгэхээр төлөвлөжээ.

Эх сурвалж: Дархан-Уул аймгийн ХХААГ.