Монголын Үндэсний Худалдаа Аж Үйлдвэрийн Танхимаас төр, хувийн хэвшлийн хамтын ажиллагааг сайжруулах, бизнес эрхлэгчдэд төрийн үйлчилгээтэй холбоотой хүндрэл бэрхшээлийг бодитой тодорхойлох зорилгоор “Хүнд суртлын индекс-2024” судалгааны үр дүнг өнөөдөр танилцууллаа. Энэхүү судалгаа нь анх 2004 оноос эхлэн хоёр жил тутам тогтмол хийгдэж ирсэн бөгөөд энэ удаа НҮБ-ын Олон Улсын Хөдөлмөрийн Байгууллагын техникийн дэмжлэгтэйгээр өргөжсөн цар хүрээтэйгээр “Хүнд суртлын индекс ба өртөг” нэртэйгээр хэрэгжжээ.
Судалгааны үр дүнд бизнесийн үйл ажиллагаатай холбоотой төрийн үйлчилгээний хүнд суртлын индекс 2.85 оноо гарсан нь өмнөх буюу 2021 оны судалгаанаас 4.8 хувиар сайжирсан үзүүлэлттэй гарчээ. Гэвч төрийн байгууллагын үйлчилгээг авахад шаардагдах мэдээлэл дутмаг, ойлгомжгүй байдал, бодлого боловсруулахад бизнес эрхлэгчдийн оролцоо хангалтгүй байгаагаас гадна хууль, журам, зохицуулалт давхардсан, зарим тохиолдолд нэг төрийн байгууллагаас авсан бичиг баримтыг нөгөө байгууллага хүлээн зөвшөөрдөггүй гэх мэт хүндрэлүүд байсаар байгаа аж.
Эдгээр дүгнэлт нь төрийн үйлчилгээний үр нөлөө, уялдаа холбоог сайжруулах шаардлагатай байгааг харуулж байгаа бөгөөд цаашид хувийн хэвшлийн бодит оролцоог нэмэгдүүлж, мэдээллийн хүртээмжийг ил тод, нэг эх сурвалжтай болгох шаардлага зүй ёсоор тавигдаж байна.
Эх сурвалж: МҮХАҮТ
