“Дэлхийн уран гулгалтын одод Монголд” нэртэй олон улсын шоу тоглолт гурав дахь удаагаа зохион байгуулагдаж байгаа бөгөөд тоглолтод оролцох алдарт уран гулгагчид маргааш “Чингис хаан” олон улсын нисэх онгоцны буудалд газардана.
Шоуны үндсэн бүрэлдэхүүнд Олимп, дэлхийн аваргууд болох Евгения Медведева, Алексей Ягудин, Елизавета Туктамышева, Виктория Синицина, Никита Кацалапов, Александр Энберт зэрэг дэлхийн хэмжээний нэр хүндтэй тамирчид багтжээ. Тэд тавдугаар сарын 24, 25-ны өдрүүдэд “Степп Арена” мөсөн өргөөнд шилдэг үзүүлбэрүүдээ толилуулах юм.
Тоглолтод Монгол, ОХУ, Гүрж, Беларусийн залуу уран гулгагчид оролцох бөгөөд манай улсаас мэргэжлийн түвшинд бэлтгэгдэж буй гурван тамирчин уран гулгалтын ур чадвараа үзүүлэхээр бэлтгэж байна.
Мөн шоуны хүрээнд уран бүтээлийн шинэ содон хослолууд ч танилцуулагдах бөгөөд “Никитон” хамтлагийн дуучин Б.Батчулуун Евгения Медведеватай, “Номин талст”-ын дуучин А.Хаянхярваа Виктория Синицина, Никита Кацалапов нартай хамтарсан үзүүлбэр бэлтгэж байгаа нь онцлог юм.
Монгол Улсад 2021 онд олон улсын стандартад нийцсэн “Степп Арена” мөсөн өргөө ашиглалтад орсноор уран гулгалтын спорт эрчимтэй хөгжиж эхэлсэн. Уг шоу нь анх 2023 онд “Тал нутгийн мөсөн шоу” нэртэйгээр Япон Улстай дипломат харилцаа тогтоосны 50 жилийн ойд зориулан анх зохиогдож байв.
Энэ удаагийн тоглолтын тасалбарыг Ticket.mn сайтаар худалдаалж байна.
Эх сурвалж: Монголын тэшүүрийн холбоо
