Японы Хөдөө аж ахуйн сайд Такү Это дэмжигчдээсээ их хэмжээний будаа авдаг учраас цагаан будаа худалдаж авдаггүй хэмээн хэлснийхээ төлөө хүчтэй шүүмжлэлд өртөж, өнөөдөр албан тушаалаасаа огцорлоо. Будааны үнэ эрс өссөн энэ үед иргэдийн бухимдлыг төрүүлсэн уг мэдэгдэл олон нийтийн зүгээс хүчтэй эсэргүүцэл дагуулсан юм.

Ерөнхий сайд Шигэрү Ишиба эхэндээ түүнийг албан тушаалдаа үлдээх байр суурьтай байсан ч олон нийтийн эсэргүүцэл намжаагүй тул албан тушаалаас нь чөлөөлөх шийдвэрийг хүлээн зөвшөөрчээ. Түүний оронд Байгаль орчны сайд асан Шинжиро Коизүми-г Хөдөө аж ахуйн сайдаар томилохоор болсныг Засгийн газрын эх сурвалж мэдээлжээ.

Такү Этогийн огцролт нь Ш.Ишибагийн Засгийн газар бүрдсэнээс хойших хамгийн анхны албан тушаалаа сайн дураараа орхисон тохиолдол боллоо. Тэрбээр өнгөрсөн арван сард болсон бүх нийтийн сонгуульд парламентын суудлаа алдсан ч дараа нь сайдын албан тушаалд томилогдсон байв.

Огцрох өргөдлөө гаргасныхаа дараа сэтгүүлчдэд хандан Т.Это “Будааны үнэ ийм эмзэг байгаа энэ үед миний хэлсэн үг тун зохисгүй байсан. Яамыг удирдах нь зүйтэй эсэх тухай өөрөөсөө асуухад би үгүй гэж хариулсан” хэмээн хүлцэл өчив.

Түүний маргаан дагуулсан мэдэгдэл нь Хөдөө аж ахуй, ойн аж ахуй, загас агнуурын яам энэ долоодугаар сар хүртэл нөөцөөс будаа гаргах шийдвэр гаргасны дараахан хийгдсэн. Засгийн газар энэ алхмаар өнгөрсөн жилийнхтэй харьцуулахад хоёр дахин нэмэгдсэн будааны үнийг тогтворжуулахыг зорьсон юм.

Такү Это нь эрх баригч Либерал ардчилсан намын хөдөө аж ахуйн бодлогын гол мэргэжилтнүүдийн нэг бөгөөд Шинзо Абэгийн Засгийн газрын үед мөн Хөдөө аж ахуйн сайдаар ажиллаж байсан туршлагатай улс төрч байв.

Эх сурвалж: Kyodo