Өнөөдөр үдээс хойш МАН-ын Бага хурлыг хуралдуулахаар болжээ. Бодвол намын дарга нь Удирдах зөвлөлдөө оруулаад, Удирдах зөвлөл нь ингэж шийдсэн байх л даа. Бага хурлаар хамтарсан засаг цаашид байх үгүйг, өөрөөр хэлбэл АН болон ХҮН-ыг Засгийн газраас гаргах эсэх асуудлыг шийдэх юм байх. МАН-ын дарга, Ерөнхий сайд Л.Оюун-Эрдэнийг орлогоо нотол гэж иргэд жагссаны хариуд Л.Оюун-Эрдэнэ ийм хориг арга хэмжээ авч байгаа юм байна. Нэг ёсондоо намаасаа улс төрийн хамгаалалт хүсч буй хэрэг.

Уг нь гурав, дөрөвхөн өдрийн өмнө сэтгүлчдийн өмнө "Орлогоо нотолно, хуулийн байгууллагаар шалгуулна" гэж хэлсэн Ерөнхий сайд яагаад ийм шийдвэрт хүрсэн нь ч тодорхой. Түүний хувьд хамтарсан Засгийн газар байх эсэх биш, өөрөө Ерөнхий сайдын суудалдаа үлдэх нь чухал байна. Өөрөөр хэлбэл засагт хамтрах, эсэхээр бага хурал дээр санал хураалгаад, Засгийн газарт хамтарсан хоёр намын суудлыг намынхандаа "найр тавих" замаар өөрийгөө аврахыг хичээж байна. Нам дотроо ийм тооцоо хийгээд харин хэвлэлээр болохоор "Хамтарсан засаг байх ёстой. Баялгийн сан, мега төслүүдийн хажууд бөгж, цүнх юу юм" гэсэн пиар хийгээд, матрын нулимс унагаад эхэлж. Маргааш "Хамтарсан засгаа хадгалж үлдэхийг хичээсэн ч нам ингэж шийдлээ" гээд толгойгоо илээд инээж зогсох нь л дээ.

Ер нь бол Л.Оюун-Эрдэнийг огцруулах асуудал огт хөндөгдөөгүй байгаа. Одоохондоо. УИХ-ын сайт дээр явуулж байгаа санал асуулга дуусаагүй, гишүүдийн гарын үсэг зурж эхэлсэн шаардлага ч УИХ-аар хэлэлцэх хэмжээнд хүрээгүй. Өнөөдөр болж байгаа процесс бол ердөө Л.Оюун-Эрдэнэ болон түүний гэр бүлийн хөрөнгө, орлогыг шалгуулахаар иргэд АТГ-т хандсан. АТГ хуулийн дагуу иргэдийн гомдлоор шалгалтын ажиллагааг эхлүүлсэн, хуулийн хугацаа нь нэг сар гэдгийг хэлсэн. Иргэдийн жагсаал ч гэсэн "Орлогоо нотол" гэдэг шаардлагатай. Нотолж чадахгүй бол огцрох нь ойлгомжтой. Энэ тохиолдолд МАН-ын бага хурал биш, парламент асуудлыг хэлэлцэнэ. Ядаж парламентын хэлэлцүүлэг эхэлсний дараа МАН бага хурлаа хуралдуулж, намын дарга, Ерөнхий сайддаа итгэл үзүүлэх эсэх тухай ярих ёстой биз дээ. 

Гэтэл хуулийн байгууллага ажиллагаа явуулж байгаа асуудал дээр, УИХ дээр асуудал нь орж ирээ ч үгүй байхад Бага хурлыг хуралдуулж, Ерөнхий сайдын огцрох, огцрохгүй, хамтарсан засаг байх үгүйг шийднэ гэдэг бол нэг талаас парламентын  бүрэн эрхэд халдаж буй хэрэг юм. Хоёрдугаарт, хуулийн байгуулллагын ажиллагаанд саад хийж, өөрийгөө ял, хариуцлагаас мултлах гэсэн увайгүй, ичгүүргүй арга. Хэдий ичгүүргүй байлаа гэхэд ингэж даварч болохгүй л дээ. Парламентын бүрэн эрхэд халдаж болохгүй. Ядаж л АТГ-аас явуулж байгаа шалгалтын ажиллагааг дуусгаад, хуудуутай ч гэсэн дүгнэлт гаргуулаад суудлаа хамгаалах хэрэгтэй шүү дээ. Албан тушаал, эрх мэдлээ ашиглаад. Тэртэй тэргүй АТГ-ын даргыг Ерөнхий сайд өөрөө хөтөлж орж ирээд УИХ-аар томилуулсан, тийм болохоор Ерөнхий сайдын эсрэг хуруугаа ч хөдөлгөхгүй гэдгийг нийтээрээ л мэдэж байгаа. Парламентын бүрэн эрхэд халдаж, институцийн хямрал үүсгэснээс томилсон албан тушаалтнаараа хууль зөрчүүлсэн нь дээр. 

Хэрвээ Ерөнхий сайд орлого нотолж чадаад, АТГ-ын зүгээс "хууль зөрчөөгүй байна аа" гэдгийг нь баримтаар нотолбол хамтарсан Засгийн газар явдгаараа явна. Л.Оюун-Эрдэнийг огцруулах тухай яриа байхгүй. Сайндаа л иргэдээ "ялаа" гэж хэлснийхээ төлөө парламентаас уучлал гуйна биз. Эрх биш иргэдээс мандат аваад сууж байгаа 126 мануухай нүдээ аниад, чихээ бөглөөд өнгөрөхгүй байлгүй дээ. Эсвэл парламент руу асуудал ороод ирвэл Ерөнхий сайдыг огцруулах өөр ноцтой үндэслэл босч ирэх гээд сандраад байна уу?

Ер нь яахаараа хамтарсан Засгийн газрын бүрэн эрхийн хугацаа дуусаагүй байхад МАН-ын бага хурал энэ асуудлыг хэлэлцэх ёстой гэж. Засгийн газрыг УИХ томилдог болохоос МАН-ын Бага хурал томилдог юм уу? Хэрэв үнэхээр МАН Засгийн газарт хамтрахаа больё гэж байгаа бол Л.Оюун-Эрдэнийгээ огцруулчихаад энэ асуудлаа ярих ёстой. Намынхнаасаа зөрөн байж энэ хамтралыг бий болгосон хүн нь Л.Оюун-Эрдэнэ өөрөө шүү дээ. 

Б.СЭМҮҮН