Ерөнхий сайд Л.Оюун-Эрдэнийн хүү О.Тэмүүлэнгийн хэтийдсэн тансаглал нийтийг бухимдуулж, орлогоо нотлох, огцрохыг шаардсан цуглаан төв талбай дээр үргэлжилж, "муухай дээр улцан" гэгчээр шүүмжлэлд өртөөд буй Ерөнхий сайд нь өөрөө хэвлэл мэдээллийн хэрэгслээр иргэдээ "ялаа" гэж дуудсан энэ өдрүүдэд Төрийн ордон дотор улс төр "халж" буй бололтой. Хаа сайгүй хөмсгөө зангидаж, шүдээ тас зуусан нөхөд.

Өнөөдөр хуралдсан МАН-ын бүлгийн хуралдаанд Ерөнхий сайд оролцсон бөгөөд бүлгийн гишүүд нь хүртэл түүнээс огцрох саналаа өгөхийг шаардсан сурагтай. Тэр бүү хэл дараагийн Засгийн газрыг байгуулахдаа цөөнхтэй хамтрахгүй, ялсан нам нь засгаа байгуулаад, цөөнх нь сөрөг хүчнийхээ ажлыг хийх ёстой гэдэг шаардлагыг хүртэл тавьсан байна.

Гэвч Ерөнхий сайдын хувьд өөрөө огцрох өргөдлөө өгөхгүй /УИХ-ын гишүүд гарын үсэг цуглуулаад ирвэл өөр хэрэг/, харин АН болон ХҮН-ыг засгаас явуулъя гэдэг хувилбарыг дэвшүүлжээ. Өөрөөр хэлбэл, МАН-ын бүлгийн хувьд Л.Оюун-Эрдэнээс хариуцлага нэхэх чухал биш, харин цөөнхийн намуудыг засгаас гаргаад өөрсдөө ширээ сандлыг нь эзлэх нэн тэргүүнд байна.  

Гэсэн хэдий ч Ерөнхий сайдын эцэг нэгтэй ах /тэр нь ч гэсэн баталгаагүй/ "Херо" Баатартай холбоотой дуулиан ирэх өдрүүдэд Л.Оюун-Эрдэнийг ороох бололтой. Ковидын үеийн хэдэн тэрбумын шоунууд, хаалттай хийсэн наадам, хилийн чанадад тавьсан жүжиг нэртэй мөнгө угаалт, 2024 оны сонгуулиар МАН-ын пиарын бүх мөнгө ах, дүү хоёрын хамтарсан компани руу цутгасан гэх мэтчилэн.

Тиймээс Ерөнхий сайдын суудлыг "алчуур" болгож өгөөд Ерөнхийлөгчийн суудалд заларсан хуурай ах У.Хүрэлсүх нь хүртэл зайгаа барьсан чимээ чих дэлсэх болсон. Иймдээ тулсан болохоор Л.Оюун-Эрдэнийн хувьд Ерөнхий сайдын суудалдаа үлдье гэвэл ямар ч байсан энэ удаа парламентын шүүлтүүрээр нэг удаа орох нь орох л байх. Тэр цагт харин нам нь ямар шийд гаргахыг харах л үлдлээ.