БНХАУ-д гадаадын 19 иргэн коронавирусийн халдвар авч, хоёр нь эдгэрч эмнэлгээс гарчээ. Үлдсэн 17 хүний эмчилгээгээ үргэлжлүүлж байгаа бөгөөд хөл хорионд байгаа аж.
Мөн Ухань хотын эмнэлэгт мэндэлсэн нярайгаас коронавирусийн халдвар илэрсэн бөгөөд төрөөд 30 цаг болсныхоо дараа халдвар авчээ. Хүүхдийн эх нь коронавирусийн халдвартай байсан байна.
Энэ тохиолдолоос улбаалан шинэ коронавирус нь эхээс хүүхдэд халддаг байж болзошгүй гэсэн дүгнэлтэд хүргэж байгааг судлаачид мэдэгджээ.
Гэхдээ шинээр мэндэлсэн хүүхдэд вирус ямар замаар халдсан тухай эцсийн дүгнэлт хараахан гараагүй байгаа аж.
Өнөөдрийн байдлаар тус вирус нь дэлхийн 28 улсад бүртгэгдэж, 28,276 хүн халдвар авсан нь тогтоогдоод байна. Хятадын Үндэсний эрүүл мэндийн хорооны өдөр тутмын тайлан мэдээнд дурдсанаар, өчигдөр оройны байдлаар коронавирусийн халдварын улмаас 565 хүн нас барж, 1173 хүн эдгэж, эмнэлгээс гарчээ.
Харин Дархан-Уул аймагт тусгаарласан иргэнээс шинэ коронавирусийн халдвар илрээгүй, одоо хяналтад байгаа гэж ЭМЯ-наас өнөөдөр мэдээлэв.
ДЭМБ-ын мэдээлснээр Шинэ коронавирусний халдвар авсан хүний тоо өчигдрөөс 3857-оор нэмэгдсэн ба халдвар авсан тохиолдолын 80 хувь нь хөнгөн явцтай байна гэж мэдээлжээ.
