Монгол Улсаас ОХУ-ын Эрхүү хотод суугаа Ерөнхий консулын газар 2025 оны тавдугаар сарын 4-ний өдөр “Үндэсний бичиг үсгийн баяр”-ын арга хэмжээг ёслол төгөлдөр зохион байгууллаа. Энэ жил 22 дахь удаагаа тэмдэглэж буй баярт Ерөнхий консулын газрын хариуцсан бүсэд суралцаж буй монгол, буриад оюутнууд болон Монголын соёл, бичиг үсгийг сонирхогч Оросын иргэд өргөнөөр оролцжээ.

Арга хэмжээний хүрээнд “Үндэсний бичиг — Өв соёл” сэдвийн дор гурван төрлийн уралдаан зохион байгуулагдаж, оролцогчид мэдлэг, ур чадвар, уран бичлэгийн авьяасаа сорьсон байна. Уралдаанд амжилттай оролцсон хүмүүст шагналыг Ерөнхий консул Б.Ичинхорлоо гардуулжээ.

Мөн энэ үеэр Монгол Улсын Боловсролын яамнаас “Үндэсний бичиг соёлыг дэлгэрүүлэгч” цол тэмдгийг олон жилийн турш үндэсний монгол бичгийг заан сурталчлагч орос, буриад иргэдэд гардуулсан байна. Тухайлбал, “Хараацай” дугуйланг 2018 оноос удирдан ажиллаж буй Загдаева Любов Барасовна тус шагналын эзэн болсон бөгөөд тэрбээр нийт 300 орчим сурагч, оюутан, сонирхогчдод үндэсний монгол бичиг зааж, соёлын өвийг түгээх үйлсэд үнэтэй хувь нэмэр оруулсан байна.

Мөн бичиг үсгийн баярт идэвхтэй оролцож, амжилтаараа манлайлсан Лубсанова Ринчинханда, Галтанцэцэг нарт энэхүү хүндэт шагналыг гардуулжээ.

Эх сурвалж: Монгол Улсын Боловсролын яам