АНУ-ын дэд ерөнхийлөгч асан Камала Харрис өнгөрсөн оны сонгуулиас хойш анх удаа олон нийтэд хандан үг хэллээ. Тэрээр Сан-Франциско хотноо болсон Emerge America байгууллагын цуглаанд оролцож, Дональд Трампын эдийн засгийн бодлогыг хатуу шүүмжилсэн юм. Энэхүү үг хэлэлт нь Трамп албан тушаалдаа орсноос хойш 100 хоног өнгөрсөнтэй давхацаж буй бөгөөд улс төрийн хувьд чухал анхаарал татаж байна.

Камала Харрис илтгэлийнхээ үеэр:

• “Трампын татварын бодлого бол Америкийн орчин үеийн түүхэн дэх зохиомлоор дэгдээсэн хамгийн том эдийн засгийн хямрал” хэмээн мэдэгдэв.

• Түүний хэлснээр сүүлийн саруудын үйл явдал жинхэнэ эмх замбараагүй байдлыг илтгэж байгаа бөгөөд татварын өөрчлөлтүүд хямралд хүргэх гол хүчин зүйл болж байна.

• Мөн Трампын бодлого нь өдөр тутмын амьдралд шууд нөлөөлж, тэтгэврийн данс болон жижиг бизнест сөрөг үр дагавар авчирч байгааг онцолсон.

• Тэрбээр “Америкийн ирээдүйг явцуу, амиа хичээсэн байдлаар төсөөлж байгаа” хэмээн Трампын мөрийн хөтөлбөрийг тодорхойлж, үнэн ярьсан хүмүүсийг Трампын багийнхан шахан хавчиж байгааг буруутгав.

Камала Харрис тус байгууллагын үйл ажиллагааг онцлон дэмжиж, эмэгтэйчүүдийн улс төрийн оролцоог нэмэгдүүлэхийн чухлыг мөн дурдав. Тэрээр үг хэлэлтийнхээ төгсгөлд “Нөхцөл байдал сайжрахаасаа өмнө улам дордох байх. Гэхдээ бид үүнд бэлэн байна” хэмээн онцлон тэмдэглэсэн байна.

Эх сурвалж: ВВС