Өчигдөр нэг ийм гоё арга хэмжээн дээр санаандгүй яваад орчихов. Английн философич Том Батлэр-Боудоны “Бизнесийн сонгодог 50 бүтээл” номыг эдийн засгийн ухааны доктор Ч.Отгочулуугийн орчуулснаар НЭПКО хэвлэлийн газраас эрхлэн гаргажээ. Англи хэл дээрх номын эх нь нэг дэвтэр байсныг Ч.Отгочулуу доктор монгол уншигчид, залуучуудад ойлгомжтой, дөхөм байдлаар зарим баримт сэлт, нэршил, утга санааг дэлгэрүүлэн тайлбарлаж, хоёр дэвтэр болгон хэвлүүлсэн байна. Үгүй мөн уйгагүй зүтгэл, чин сэтгэл ээ.

Номын редактораар ажилласан Эдийн засгийн боловсрол, өрсөлдөх чадварын судалгааны төвийн ТУЗ-ийн дарга /Сангийн сайд асан/ П.Цагаан "Манай Отгочулуу өмнө нь дандаа герман хэлнээс орчуулж байсан, англи хэлнээс орчуулсан анхны ном нь. Энэ номыг унших явцад уйлмаар санагдах биш, уйлсан үеүд маш олон бий" хэмээсэн.

Учир нь энэ номд орчин үеийн дэлхий, соёлт ертөнцийг бий болгосон энтерпренерүүд /манайхны хэлээр "капиталистууд"/ бизнесээ босгохын тулд ямар зам, зовлон бэрхшээлийг туулсан, хэрхэн аз сорьсон, унасан боссон түүхийг хар цагаантай нь өгүүлсэн. Бизнес хийх, аз сорих, шинийг бүтээх хүсэлтэй залуу үеийнхэнд маш том гарын авлага гэсэн үг. 

Номыг яагаад зохиолч биш, сэтгүүлч биш, философич хүн бичсэн бэ гэвэл энэ номд тэдгээр шилдэг 50 бизнесүүдийн өрсөлдөөний зарчим, үзэл санаа, туршлагыг унаж боссон түүхтэй хамт судалж, нарийн тодорхой өгүүлсэнд байна. 

Өмнөх Ерөнхий сайд асан маань өөрийнхөө Засгийн газрын тухай "мөс зүсээд" энэ тэр гээд "гоё гоё" зүйрлэл хэлдэг байсан даа. Атал жинхэнэ мөс зүсэгчид, нийгмийн хөгжлийг урагш чирэгчид бол энтерпренерүүд, шинийг санаачилж, сорилтыг даван туулж, амжилтад хүрэгсэд буюу чөлөөт бизнесүүд юмаа гэдэг нь уг номын гол философи юм.

Энэ утгаараа зөвхөн залуучууд, бизнес эрхлэгчид, бизнест амжилт олохыг хүсэгчид, эрэл хайгуулчид төдийгүй манай төрийн шийдвэр гаргагч нарт ч гэсэн шинээр танин мэдэхүй, мэдлэг, боловсрол болохуйц ийм нэг шинэ ном хэвлэлтээс гарсан байна даа.

Эцэст нь нээлтийн ёслолд оролцсон, уригдсан зочид, мэргэжил нэгт нөхдийн адилаар, уламжлал ёсоор энэ чухал номыг Монголын уншигчид, монгол хэлтнүүдэд хүргэж байгаа номын орчуулагч болон зөвлөх редактор, мөн НЭПКО компанийн хамт олонд гүн талархал...

Б.ЗАЯА