Төр, хувийн хэвшлийн хамтын ажиллагааг бэхжүүлж, гадаад худалдааг өргөжүүлэх, бизнес эрхлэгчдэд тулгарч буй саад бэрхшээлийг хамтран шийдэхээр “Худалдаа, бизнесийн салбарыг онцлох өдөр”-ийг зохион байгууллаа.
“Хөрөнгө оруулалт, худалдааны газрын нэрэмжит 7 хоног”-ийн хүрээнд ЭЗХЯ-ны дэргэдэх Хөрөнгө оруулагчдын эрх ашгийг хамгаалах төвд зохион байгуулж буй тус уулзалтыг нээж ЭЗХЯ-ны Худалдаа, эдийн засгийн хамтын ажиллагааны бодлогын газрын дарга Д.Эрдэнэтуяа Монгол Улсын гадаад худалдааны нөхцөл байдал, худалдааг дэмжих бодлого, экспортын боломжийг нэмэх чиглэлд хийж буй ажлаа танилцуулав. Энэ хүрээнд монголын гадаад худалдааны нөхцөл байдал, гаалийн байгууллагын үйл ажиллагаа, гаалийн татварын хөнгөлөлт, чөлөөлөлт, Монгол Улсаас БНХАУ-д экспортлох хөдөө аж ахуйн гаралтай бараа, бүтээгдэхүүний шинжилгээ, Узбекистан улсын зах зээлийн эргэлт, экспортлогчдыг дэмжих санхүүгийн үйлчилгээ, тээвэр, логистикийн нөхцөл байдлын талаар мэдээлж, оролцогчид санал солилцсоныг ЭЗХЯ мэдээлсэн юм.
Түүнчлэн гадаад худалдааны баримт бичгийг цахимжуулах, гарал үүслийн гэрчилгээг хялбаршуулах явц, экспортын туршлага, худалдааны гэрээтэй холбоотой маргааныг шийдэхэд анхаарах тухай мэдээлэл өгч, бизнес эрхлэгчдийн тулгамдсан асуудлыг шийдэх талаар хэлэлцүүллээ.
Уулзалтад ЭЗХЯ, ГЕГ, МУИС, МҮХАҮТ, Улаанбаатар хотын Худалдааны танхим, Зээлийн батлан даалтын сан болон тээвэр, логистик, экспортын чиглэлээр үйл ажиллагаа явуулж буй аж ахуйн нэгжийн 60 гаруй төлөөлөл оролцож, гадаад худалдаа, экспортын боломж, бэрхшээлийн талаар хэлэлцэж, харилцан санал солилцжээ.
