Гашуунсухайт-Ганцмод боомтын хил холболтын төмөр замыг ашиглалтад оруулснаар Монгол Улсын төмөр замын экспортыг 30 сая тонноор нэмж, тээврийн өртөг багасна.

Мөн Монгол Улс Ази, Европыг холбосон дамжин өнгөрөх тээврийн хоёр дахь гарцтай болж, экспортын орлого 1.5 тэрбум ам.доллароор нэмэгдэх, ДНБ-ий хэмжээ нэг хүнд ногдох дүнгээр 10 мянган ам.долларт хүрэх боломж бүрдэх тооцоог ЗТЯ мэдээллээ.

Өнгөрсөн оны тавдугаар сараас эхэлж 10 хувьтай үргэлжилж байгаа төслийн ажилтай Зам, тээврийн сайд Б.Дэлгэрсайхан танилцав. Одоогоор төмөр замын доод бүтцийн газар шорооны хөрс хуулах, жаазан гүүрийн их биеийн бетон, дөрвөлжин, дугуй хоолойн их биеийн бетон цутгалтыг 13 байршилд хийж, 9.5 км гүүр барихаас 1330 ширхэг шон суурь өрөмдөж, тулгуурын хөндлөн нуруу, завсрын тулгуурыг тавьжээ. Мөн 4 км урт, 35/10 кВт-ын гурван хэлхээт түр цахилгаан хангамжийг угсарсан байна.

Тус бүтээн байгуулалт нь нарийн царигийн 10.8 км, өргөн царигийн 8.7 км төмөр замтай, нийт 32.6 км урт байх бөгөөд нарийн царигаар жилд 20 сая, өргөн царигаар 30 сая тонн хүртэлх ачаа тээвэрлэх хүчин чадалтайгаар 2027 онд ашиглалтад өгөхөөр төлөвлөж байна.

Түүнчлэн хил дамнасан төмөр замаар тээвэр хийснээр байнгын 200, түр ажлын 800 байр бий болж, орон нутгийн хөдөлмөр эрхлэлтийг дэмжихээс гадна Монгол, Хятадын Шивээхүрэн-Сэхээ, Бичигт-Зүүнхатавч, Ханги-Мандал зэрэг хилийн боомтыг төмөр замаар шат дараатай холбох нөхцөл боломж бүрдэх ажээ.