Хил Хязгааргүй Сэтгүүлчид Reporters sans frontières / Reporters Without Borders / RSF олон улсын байгууллагаас гаргадаг Дэлхийн хэвлэлийн эрх чөлөөний индексээр Монгол Улс 2 байр ухарч 71-р байранд жагслаа.
“Сэтгүүл зүйг үзэн ядах нь ардчилалд заналхийлж байна”
Хил Хязгааргүй Сэтгүүлчид байгууллагаас эмхэтгэн гаргаж буй 2018 оны Дэлхийн Хэвлэлийн Эрх Чөлөөний Индекс нь сэтгүүлчдийн эсрэг өшөө хорсол нэмэгдсээр байгааг харуулж байна. Энэ өшөө хорслыг улстөрчид нээлттэй дэмжиж буй явдлаас эхлээд авторитар дэглэмүүд өөрсдийн сэтгүүл зүйн талаарх үзлээ гадагш түгээх оролдлогууд нь ардчилалд аюул учруулж эхэллээ. Жил бүр дэлхийн 180 улс дахь сэтгүүл зүйн нөхцөл байдалд үнэлгээ хийж буй манай индексээс харахад үзэн ядалтын байдал улам бүр тодрон биежсээр байна.
Монголын телевизийн сувгууд Ерөнхийлөгчийн сонгуулийн өмнөхөн буюу 2017 оны 4 дүгээр сарын 26-ны өдөр шинээр батлагдах Зөрчлийн тухай хуулийг эсэргүүцэн хөтөлбөрүүдээ түр хаасан. Тус улсын хэмжээнд бүртгэгдсэн гүтгэхтэй холбоотой нийт хэргийн талаас илүү нь сэтгүүлч, хэвлэл мэдээллийн хэрэгслийн эсрэг байгаа нь өөрийн цензурийн хүрээг тэлж байна. Харин ерөнхий дүр зургаар нь харвал, төрийн мэдлийн хэвлэл мэдээллийн хэрэгслүүд нь олон нийтийн өмчлөлд шилжиж ардчиллыг манах хоточ нохой болж буй нь сайны дохио юм. Гэхдээ хэвлэл мэдээллийн хэрэгслүүдийн эзэмшил хэт төвлөрч байгаа төдийгүй улс төрийн намуудтай сүжрэх болсон нь бие даасан, хараат бус хэвлэл мэдээллийг хойш татаж байна. Мөн тухайн байгууллагын өмчлөлийн хэлбэрээс үл хамаарч улстөрчдийн зүгээс ирэх дарамт, засгийн газрын ил тод бус, шүүмжлэлд эмзэг хандах байдал зэрэг нь хэвлэл мэдээллийн үндсэн үүргийг хязгаарлаж байна.
