МҮБХ-ны удирдлагууд ХЗДХ-ийн сайд Ц.Нямдорж, ЦЕГ-ын дарга С.Баатаржав нарт гомдол гаргажээ. Тэд цагдаагийн байгууллагын удирдах дээд албан тушаалтнууд эрх мэдэл, албан тушаалаа урвуулан ашиглаж, хууль бус үйл ажиллагаа явуулан, хүний эрх, эрх чөлөөг ноцтой зөрчиж байна гэж үзсэн байна.

Холбооны дотоод үйл ажиллагаанд хөндлөнгөөс оролцож, гэмт хэрэг үйлдэхэд хамтран тусалж, УИХ-ын гишүүний биед халдах боломж бололцоог бий болгосон гэмт хэрэгтнүүдэд ямар ч хариуцлага тооцохгүй хамгаалж, хэт нэг талд үйлчилж байгаа тул арга буюу хандахад хүрч байна гэв.

Тодруулбал, Р.Нямдорж нь МҮБХ-ны тэргүүнээр 16 жил хууль бусаар ажилласныг гурван шатны шүүхийн зургаан удаагийн шийдвэрээр тогтоосон байна. Мөн Шүүхийн шийдвэр гүйцэтгэх байгууллагаас түүний хэрэглэж буй, тамга тэмдэг, гэрчилгээг хүчингүй болгож, үйл ажиллагаа явуулахгүй байхыг сануулсан ч тэр өнгөрөгч гуравдугаар сард хууль бус хурал зохион байгуулж, УИХ-ын гишүүн Б.Бат-Эрдэнийг холбооны тэргүүнээр сонгосон аж.

Энэ бүх хууль бус ажиллагаанд цагдаагийнхан гар бие оролцон, Бөхийн өргөөг хамгаалан хууль зөрчигчдийн талд үйлчилж байгаа нь ЦЕГ-ын тэргүүн дэд дарга Р.Отгонжаргалтай холбоотой тухай гомдолдоо дурджээ. ЦЕГ-ын тэргүүн дэд дарга Р.Отгонжаргал нь МҮБХ-ны тэргүүн асан Р.Нямдоржийн төрсөн дүү бөгөөд хувийн эрх ашигийн төлөө цагдаагийн байгууллагыг ашиглаж, хууль зөрчигчдийн талд үйлчилж, гэмт үйлдлийг нь өөгшүүлэн албаны эрх мэдлээ урвуулан ашиглаж байна гэв.