91 дэх удаагийн Оскарын наадам болоход ердөө тавхан хоног үлдээд байна. Шагнал гардуулах ёслол Монголын цагаар 25-ны өглөөний 7 цагт эхлэх юм. Хэдхэн цагийн өмнө Оскарын наадмын тайз заслыг хариуцан ажиллаж байгаа театрын зураач Дэвид Коринс өөрийн Инстаграм хуудсаараа дамжуулан ёслолын тайзыг олонд харууллаа. Тайз "Crystal Cloud" буюу "Болор үүл" гэх нэртэй бөгөөд тайзан дээр 40,000 ширхэг амьд сарнай байршуулах аж. Мөн тус наадам 30 жилийн дараа анх удаа хөтлөгчгүй зохиогдох гэж байгаа билээ.

Өнөөдөр хэвлэл мэдээллээр кино урлагийн хамгийн шилдэг шагнал гардуулах ёслолтой холбоотой төрөл бүрийн мэдээ цацагдаж байгаа ба наадмын хамгийн сонирхолтой мэдээ бол Queen хамтлаг шагнал гардуулах ёслол дээр тоглоно гэдгээ мэдэгдсэн явдал юм.

Queen хамтлагийн үндсэн гишүүд болох Брайан Мэй, Рожер Тейлор дээр сүүлийн жилүүдэд Фредди Меркьюрийг орлож яваа дуучин Адам Ламберт нарын хослол ийнхүү Оскарын наадамд анх удаагаа уран бүтээлээ хүргэхээр болжээ. 

Мөн Оскарын тайзан дээр дуучин Лэди Гага, жүжигчин Брэдли Күүпер нар "A Star is Born" киноныхоо "Shallow" дууг дуулах бол шилдэг дуу төрөлд нэр дэвшсэн хэд хэдэн дуу дуулагдах аж. 

Эргэн сануулахад, Queen хамтлагийн дуучин Фредди Меркуригийн тухай өгүүлэх “Bohemian Rhapsody” кино нь 91 дэх Оскарын наадамд нийт таван /Шилдэг кино, Шилдэг хөгжмийн найруулга, Шилдэг хөгжмийн эвлүүлэг, Шилдэг кино эвлүүлэг, Шилдэг эрэгтэй гол дүр/ төрөлд нэр дэвшин байгаа ба жүжигчин Рами Малек домогт дуучин Фрэдди Мэркүригийн дүрийг бүтээснээрээ анх удаа Оскарт нэр дэвшиж байгаа юм. Тэрээр өнгөрсөн нэгдүгээр сард болсон "Алтан бөмбөрцөг" наадмаас шилдэг эрэгтэй жүжигчин шагналыг хүртсэн билээ. 

Бид хайртай хамтлагийнхаа бас нэгэн гайхалтай түүхэн мөчийн эзэн нь болох ээ.