Монголын боловсрол, шинжлэх ухааны үйлдвэрчний эвлэлийн холбоо багш нарын цалин хөлсийг нэмэгдүүлэх шаардлага хүргүүлж, энэ сарын 30-ны дотор шийдвэрлэхгүй бол жагсаал зохион байгуулахаа зарлалаа. Тус холбооноос таван заалт бүхий шаардлагыг Засгийн газарт хүргүүлсэн байна.
Засгийн газарт хүргүүлж буй шаардлага:
- Төрийн албан хаагчдын цалин хөлсийг нэмэгдүүлэх асуудлаар хийх “Хөдөлмөр, нийгмийн зөвшлийн гурван талт улсын хэлэлцээр”-ийн нэмэлтийг дөрөвдүгээр сарын 30-ны дотор яаралтай хийж тохиролцоонд хүрэх
- “2018 оны улсын төсөвт 56.6 тэрбум төгрөг тусгаж, төсвийн байгууллагын ажилчдын бодит орлогыг нэмэгдүүлнэ” гэсэн “Хөдөлмөр, нийгмийн зөвшлийн гурван талт улсын хэлэлцээр”-ийн нэмэлтийг сургууль, цэцэрлэгийн амралт хэлэхээс өмнө хэрэгжүүлж эхлэх
- УИХ-ын 2017 оны дөрөвдүгээр сарын 14-ний өдрийн 29 дүгээр тогтоолын 4, 5, 6 дугаар заалтуудыг хүчингүй болгох асуудлыг УИХ-д тавьж, шийдвэрлүүлэх
- Засгийн газрын 2017 оны 12 дугаар сарын 20-ны өдрийн 346 дугаар тогтоолоор батлагдсан “Төрийн болон орон нутгийн өмчийн цэцэрлэг, сургууль, мэргэжлийн боловсролын байгууллагын багш, албан хаагчдын улирлын ажлын үр дүнгийн мөнгөн урамшуулал олгох журам”-ын дагуу олгогдох урамшуулал төсөвт бүрэн тусгагдаагүй тул улсын төсөвт тодотгол хийх
- БСШУСЯ, Монголын Боловсрол Шинжлэх Ухааны ҮЭХ-оос “Хөдөлмөр, нийгмийн зөвшлийн гурван талт улсын хэлэлцээрийн нэмэлтээр тохиролцсон асуудлуудыг хэрэгжүүлэх, хамтын хэлэлцээрийн хэрэгжилтийг хангах асуудлаар тодорхой арга хэмжээ авах.
“Өнгөрсөн 2017 оны аравдугаар сарын 28-нд бидэнтэй уулзахад Монгол Улсын Засгийн газар, ОУВС-тай тохиролцоод цалин хөлсийг үе шаттай нэмэгдүүлнэ, 2018 оны хоёрдугаар улиралд багтаан төрийн албан хаагчдын цалин хөлсийг нэмэгдүүлнэ гэж тохиролцсон. Гэтэл энэ хэлэлцээрийг ОУВС-тай хийсэнгүй. Бид маш их хүлээлээ. Энэ сардаа багтаж ямар нэгэн алхам хийх ёстой. Хэрэв энэ байдлаараа байвал шинэ хичээлийн жил эхэлж ч чадахгүй нөхцөл үүснэ” гэж МБШУҮЭ-ийн холбооны дарга Ж.Батзориг ярилаа.
Сургуулийн өмнөх боловсрол, ерөнхий боловсролын салбарт ажилладаг хот болон орон нутгийн ажилтнууд бид уртасгасан цагаар өдөр бүр ачаалалтай ажилладаг тул өөрсдийн хөдөлмөрлөх нөхцөл байдлыг сайжруулах талаар тэмцэх ямар ч цаг байдаггүй. Тиймээс ҮЭХ-оороо дамжуулан энэхүү шаардлагыг хүргүүлж байна гэдгээ илэрхийлээд шаардлагын хариуг 2018 оны дөрөвдүгээр сарын 30-ны дотор ирүүлээгүй тохиолдолд хуулийн хүрээнд тэмцлээ эрчимжүүлэхээ мэдэгдлээ.
