Хуульч зөвлөж байна
Бидний хэлж сурснаар автомашины сигнал буюу дуут дохио нь зөв хэрэглэвэл хүний амь насыг аврах ч хүчтэй. Харин буруу газар буруу зорилгоор хэрэглэвэл бусдын дургүйг хүргэх, хүний эрүүл мэндэд хохирол учруулах зэрэг өөр олон олон хор уршиг дагуулж байна.
Улаанбаатар хотын хувьд өглөөний 07 цагаас шөнийн 01 цагийн хооронд автомашины сигналдах чимээ бараг л тасардаггүй. Гэвч Монгол Улсын замын хөдөлгөөний дүрмийн 6 дугаар зүйлийн 6.1 дэх хэсэгт дуут дохиог зөвхөн дараахь тохиолдолд хэрэглэхээр зохицуулсныг жолоочид тэр бүр мэддэггүй.
Нэгд, зам тээврийн ослоос урьдчилан сэргийлэхийн тулд;
Хоёрт, суурин газрын гаднах замд гүйцэж түрүүлэхийн тулд бусад жолоочид анхааруулах зорилгоор” гэж заасны дагуу дээрх тохиолдолд л дуут дохиог хэрэглэх боломжтой.
Автомашин жолоодох эрхийн үнэмлэхийг авахаас өмнө сургалт, хичээлээр энэхүү зохицуулалтыг бүх жолооч нар заалгаж, судалж дуусаад шалгалт өгөөд тэнцсэн тохиолдолд автомашин жолоодох эрхийн үнэмлэхээ авдаг. Харин жолооны үнэмлэхээ авсны дараа энэ зохицуулалтыг дагаж мөрдөж байгаа жолооч, энэхүү зохицуулалтын хэрэгжилтэд хяналт тавьдаггүйгээс дуртай үедээ дуут дохио хэрэглэж болно гэх ойлголт бий болжээ.
Гэвч нэгэнт хууль бий тул дуут дохионоос болж торгуулах эрсдэл танд тохиолдож болох юм. Тодруулбал, 2017 оны 07 дугаар сарын 01-ний өдрөөс эхлэн хэрэгжиж буй Зөрчлийн тухай хуулийн 14.7 дугаар зүйлийн 24 дэх хэсэгт “3амын хөдөлгөөний дүрэмд заасан тээврийн хэрэгслийн дуут дохио өгөх журам зөрчсөн бол хүнийг хорин нэгжтэй тэнцэх хэмжээний төгрөгөөр торгоно.” гэж заасан байдаг. /хорин нэгж гэдэг нь 20.000 төгрөгтэй тэнцэнэ/
Дуут дохиог ийнхүү хориглох нь тодорхой шалтгаантай бөгөөд үүнээс үүдэлтэй эрсдэл золгүй явдал ч бүртгэгдсэн байна. “Иргэн Б-нь нярай хүүгээ тэврээд автобусны буудал дээр унаа хүлээгээд зогсч байтал замын хөдөлгөөнд оролцож явсан автобусны дуут дохионы улмаас нярай тархинд цус харвасан харамсалтай хэрэг гарчээ”
Ганцхан удаагийн энэ мэт болгоомжгүй үйлдлийн улмаас зөвхөн Зөрчлийн тухай хуульд заасны дагуу 20.000 төгрөгөөр торгуулаад өнгөрөх биш Эрүүгийн хуулийн 11.3 дугаар зүйлд заасан “хүний эрүүл мэндэд хүнд хохирол болгоомжгүйгээр учруулах гэмт хэргийн буруутан болох ч эрсдэлтэй. Энэ үед хамгийн багадаа зургаан сараас гурван жил хүртэл хугацаагаар хорих ял шийтгэх арга хэмжээг шүүхээс авах хууль зохицуулалттай байдаг. Мэдээж нөгөө талд нь хэн нэгэн насан туршдаа эрүүл мэндээрээ хохирогч болон үлдэх юм.
Дуут дохиогоо түгжрэлд уураа гаргаж загнах хэрэгсэл, хаалт хаалга онгойлгуулах “түлхүүр”, ойр яваа танилаа дуудах “харилцааны хэрэглэл” болгож хэрэглэдэг жолоочид хэзээ нэгэн өдөр торгуулах эрсдэл гаргаж, хариуцлага хүлээх зүйл хийж байна гэдгээ ойлгох шаардлагатай болох нь.
Веритас партнерс хуулийн фирм. Д.Алтангэрэл
