Хөвсгөл аймгийн зарим нутагт энэ жил хуш модны самар бага гарснаас хүрэн баавгайн идэш тэжээл хомсоджээ. Үүнээс шалтгаалан баавгай хоол тэжээл хайж сумын төв, суурьшлын бүс, айл өрх, малчны хотонд ойртох эрсдэл нэмэгдсэн байна.
Хатгал тосгоноос найман километрийн зайд дөрвөн баавгай явж байгаатай иргэд таарчээ. Иймд Хөвсгөл аймгийн Байгаль орчны газраас иргэд, малчид, аялагчдыг уул, ойд явахдаа сонор сэрэмжтэй байхыг анхаарууллаа.
Сүүлийн үед баавгай уулаас бууж, суурьшлын бүсэд ойртох тохиолдол бүртгэгдэж байгаа тул хадлан бэлтгэх, жимс, самар түүхээр хөдөө явах, мал болон алдуул малаа хайж ууланд гарахдаа болгоомжтой байхыг зөвлөжээ.
Баавгай үзэгдсэн, мөр нь илэрсэн газарт ганцаараа явахгүй, хүүхдийг хараа хяналтгүй орхихгүй байхыг анхаарууллаа. Мөн өглөө эрт, орой бүрэнхий болон шөнийн цагаар уул, ойд явахгүй байхыг зөвлөж байна.
Ой, өтгөн бут, голын шугуйгаар явахдаа үе үе дуу чимээ гаргаж, баавгайг гэнэт цочоохоос сэргийлэх хэрэгтэй. Харин бамбарууштай таарвал ойртохгүй, тухайн газраас тайван холдох нь зүйтэй. Учир нь эх баавгай бамбаруушийнхаа ойролцоо байх магадлалтай юм.
Хөвсгөл аймгийн Цагаан-Уул, Баянзүрх, Улаан-Уул, Цагааннуур, Рэнчинлхүмбэ, Ханх, Чандмань-Өндөр, Цагаан-Үүр, Эрдэнэбулган зэрэг 10 сумын нутагт хүрэн баавгай тархан амьдардаг гэсэн судалгаа бий.
