Цөмийн цэнэгт хошуу тээгч стратегийн шинэ пуужин болох "Сармат"-ыг энэ оны эцэс гэхэд зэвсэглэлд нийлүүлнэ гэж ОХУ-ын Ерөнхийлөгч Владимир Путин мягмар гарагт мэдэгджээ. Тэрбээр уг пуужинг "дэлхий дээрх хамгийн хүчирхэг зэвсэг" хэмээн тодорхойлсон байна.
АНУ, Европ дахь хэдэн мянган км-ын алсад буй байнуудад цөмийн цэнэгт хошуугаар цохилт өгөхийн тулд бүтээсэн уг пуужинг зэвсэглэлд нэвтрүүлэх ажил олон жилийн турш саатсан юм.
В.Путин телевизээр хэлсэн үгэндээ, "Сармат" пуужингийн цөмийн цэнэгт хошууны хүчин чадал нь барууны орнуудын ижил төрлийн пуужингийнхаас дөрөв дахин их ба тусгал нь 35 мянган км-ээс давна гэж мэдэгджээ
"Энэхүү пуужин одоо байгаа болон ирээдүйд бий болох пуужингийн довтолгооноос хамгаалах ямар ч системийг нэвтлэх чадалтай" гэж тэрбээр хэлсэн байна.
2022 онд Украины дайн эхэлснээс хойш В.Путин Оросын цөмийн зэвсгийн хүчин чадлыг дэлхий нийтэд удаа дараа сануулсаар ирсэн юм. Энэ бол Барууны орнууд Украины талд хэт идэвхтэй зогсохоос сэргийлэх гэсэн оролдлого гэж шинжээчид үзэж байгаа юм.
