Ерөнхий сайд Кир Стармерын явуулж буй бодлоготой санал нийлэхгүй байгаагаа илэрхийлэн Их Британийн Хүүхэд хамгааллын сайд Жесс Филлипс огцрох өргөдлөө өгчээ.
Парламент дахь эрх баригч Лейборист намын 80 гаруй депутат Ерөнхий сайдад хандан огцрох товоо зарлахыг уриалсан энэ үед Ж.Филлипс огцрох шийдвэрээ гаргасан хоёр дахь сайд боллоо. Өмнө нь Орон сууц, орон нутгийн засаг захиргааны асуудал эрхэлсэн дэд сайд Миатта Фанбулле Ерөнхий сайдын чиг баримтлалтай санал нийлэхгүй байгаагаа илэрхийлэн огцрохоо мэдэгджээ.
Энэ сарын 7-нд болсон орон нутгийн сонгуулийн дүнгээр Лейборист нам түүхэнд анх удаагаа Уэльсийн парламентад олонхийн суудлаа алдсаны дараа Их Британид улс төрийн хямрал дэгдсэн байна. К.Стармер үүний хариуцлагыг хүлээнэ гэдгээ мэдэгдсэн боловч намын дарга ба Ерөнхий сайдын албан тушаалаас огцрохоос татгалзжээ.
Сүүлийн өдрүүдэд Стармерыг огцрохыг шаардаж буй Лейборист намаас Нийтийн танхимд сонгогдсон депутатуудын тоо хоёр дахин нэмэгдэж 80 гаруйд хүрсэн байна. Тэдний үзэж байгаагаар, Стармер цаашдаа Даунин-стритэд байсаар байвал 2029 оны наймдугаар сараас өмнө болох дараа дараагийн сонгуулиудад намын эзлэх байр суурь суларна.
Парламентын доод танхим болох Нийтийн танхимын 650 суудлаас 403-ыг нь лейбористууд эзэлдэг байна.
