"Sports Illustrated" сэтгүүл хөл бөмбөгийн дэлхийн аварга шалгаруулах тэмцээний (ДАШТ) үеэр томоохон хэмжээний цуврал тоглолт болон VIP үдэшлэгүүдийг зохион байгуулах гэж байгаа тухайгаа мэдэгджээ. АНУ-ын дөрвөн хотод болох эдгээр тоглолтод оролцох гол уран бүтээлчид нь 50 Cent, Nelly, The Chainsmokers, Diplo болон Gordo нар байх болно гэж AP агентлаг мэдээлсэн байна.
Тус сэтгүүл ДАШТ-д зориулсан "SI Beyond the Pitch" нэртэй хөгжмийн шинэ цуврал төсөл эхлүүлж байгаагаа зарласан байна. Төслийн хүрээнд Лос-Анжелес, Даллас, Майами, Нью-Йорк хотуудад тоглолтууд ба VIP үдэшлэгүүдийг зохион байгуулах ажээ.
Олон улсын хөл бөмбөгийн холбоо (ФИФА) зохион байгуулагч орнуудын эрх тэгш байдлыг тодотгох үүднээс АНУ, Канад, Мексик улсуудад гурван удаа нээлтийн ёслол хийхээр шийдвэрлэжээ.
"The Athletic" цахим хэвлэлд мэдээлснээр, нээлтийн тоглолтуудын өмнө АНУ-д Кэти Перри, Канадад Майкл Бубле, Мексикт Mana хамтлаг тус тус ая дуугаа өргөнө.
