Үл мэдэгдэх нисдэг биетүүдтэй /UFO/ холбоотой файлуудыг АНУ-ын Батлан хамгаалах яам нийтэлж эхэлжээ. Эдгээр файлыг нийтэлсэн тусгай хэсэг өчигдөр Пентагоны цахим хуудсанд бий болсон байна.
Агаар мандал дахь үл мэдэгдэх үзэгдлүүдийн талаар эрх баригчид эцсийн дүгнэлт хийх боломжгүй болсон тул олон нийт болон шинжээчдээр дүн шинжилгээ хийлгүүлэхээр БХЯ шийдвэрлэжээ.
Ийм төрлийн архивыг бий болгосон нь олон арван яам, агентлагуудын хооронд уялдаа холбоог бий болгох, олон сая баримт бичгүүдийг шалгах зорилго бүхий урьд хожид гарч байгаагүй түүхэн санаачилга болсныг Пентагоны төлөөлөгчид онцоллоо. Тухайлбал, үл мэдэгдэх нисдэг биетүүдийн тухай файлуудыг нийтлэхэд Цагаан ордон, Үндэсний тагнуулын газар, Эрчим хүчний яам, НАСА, Холбооны мөрдөх товчоо болон тагнуулын бусад агентлаг оролцож байна.
Одоогийн байдлаар 161 файлыг нийтлээд байгаа бөгөөд аюулгүй байдлын үүднээс тэдгээрийг сайтар шалгажээ. Үл мэдэгдэх нисдэг биетүүдийн тухай файлуудыг нууцаас гаргахыг Ерөнхийлөгч Д.Трамп энэ оны хоёрдугаар сард үүрэг болгосон юм.
Үүнээс өмнөхөн UFO-гийн тухай сэдэв Америкийн олон нийтийн сонирхлыг ихээр татах болсон байна. Ерөнхийлөгч асан Б.Обама подкастын хөтлөгч Брайан Тайлер Коэны “харь гаргийнхан гэж бий юү” гэсэн асуултад хошин байдлаар хариулахдаа “байдаг, гэхдээ би тэднийг хараагүй, хэрвээ АНУ-ын Ерөнхийлөгчөөс нуудаггүй л юм бол харь гаргийнхныг хорьж байдаг газар дорх бункер гэж байхгүй” гэжээ.
Обамагийн энэ үг нийгмийн сүлжээгээр тархаж, олон нийтийн дунд өргөн хэлэлцүүлэг явагдаж эхэлсэн байна. Үүний дараа ерөнхийлөгч асан мэдэгдэхдээ, харь гаргийнхан манай гаргийнхантай холбоо барьсан гэх нотолгоог төрийн тэргүүн байх үедээ олж хараагүй гэжээ.
Түүнээс гадна, харь гаргийнхан байдгийг баталсан ямар ч баримт нотолгоо байхгүй гэдгийг Пентагон 2022 ба 2024 онуудад мэдэгдэж байсан юм.
