Испанийн хөл бөмбөгийн “Реал Мадрид” клубийн ерөнхийлөгч Флорентино Перес хэвлэлийн хурлын үеэр мэдэгдэхдээ, тус клубийн тэргүүнийг сонгох ээлжит бус сонгуулийг удахгүй зохион байгуулна гэлээ.
“Реал”-ын ерөнхийлөгчийн ээлжит сонгууль 2029 онд явагдах ёстой бөгөөд Перес 2025 оны нэгдүгээр сард уг албан тушаалд дахин сонгогдсон юм.
“Би огцрохоор төлөвлөөгүй. “Реал” бол клубийн гишүүдийн эзэмшилд байдаг учраас тэд асуудлыг шийдэх ёстой. Бусад хүмүүс ч нэрээ дэвшүүлж, мөрийн хөтөлбөрөө танилцуулах биз ээ, намайг шүүмжилдэг хэн ч байсан энэ сонгуульд нэрээ дэвшүүлэх боломжтой” гэж Перес хэллээ.
Өдгөө 79 настай Перес 2009 оноос хойш “Реал”-ын ерөнхийлөгчийн албыг хашиж байгаа бөгөөд 2000-2006 онд мөн ерөнхийлөгчөөр ажиллаж байсан юм. Пересийн үед “Реал Мадрид” баг Испанийн аваргаар 7 удаа шалгарч, Испанийн цомын тэмцээнд 3 удаа, Аваргуудын лигийн тэмцээнд 7 удаа түрүүлсэн байна. Мөн Испанийн супер цомыг 7 удаа өргөж, клубүүдийн ДАШТ-д 5 удаа аваргалж, Тив хоорондын цомыг 2 удаа хүртжээ.
Харин энэ улиралд тус баг Испанийн АШТ-д түрүүлэх боломжоо алдаж, Аваргуудын лигийн шөвгийн наймын тоглолтод хожигдсон байна.
