“Монголын үндэсний олон нийтийн телевизийн дуу бичлэгийн студид хөрвүүлэв” гэх танил дуу хоолойг сонсоход үзэгч бүрийн сэтгэлд итгэл төрдөг. Тэр дуу хоолойны эзэн бол Монгол Улсын соёлын тэргүүний ажилтан, дуу оруулагч, жүжигчин Ө.Наранбаатар юм.

Тэрбээр тун удахгүй Монгол Улсын Гавьяат жүжигчин цол хүртэх гэж байгаа бөгөөд энэ мэдээ түүний дуу хоолойд дассан олон мянган үзэгч, сонсогчдын сэтгэлийг баярлуулж байна. Ө.Наранбаатар нийт 20 мянга гаруй кинонд дуу оруулж, дүр бүрт амьдрал, сэтгэл шингээсэн бүтээлч хүн юм.

“МҮОНТ бол намайг анх өлгийдөж авсан байгууллага” гэж тэр дурсдаг. Тэрбээр 1989 онд арван жилийг төгсөөд Улсын Багшийн дээд сургуулийн кино драмын ангид шалгалт өгч, улмаар Соёл урлагийн их сургуулийн анхны элсэгчдийн нэг болж урлагийн замналаа эхэлсэн байна.

Ө.Наранбаатар нь Монголын кино урлагт дуу оруулгын урлагийг хөгжүүлэхэд үнэтэй хувь нэмэр оруулж, дуу хоолойгоороо олон үеийн үзэгчдийн сэтгэлд үлдсэн уран бүтээлч билээ.