Ирландын нийслэл Дублин хотын алдарт Молли Малоуны хөшөөг “аз авчрах” гэсэн жуулчдын итгэл найдвар сүйрэлд хүргэжээ. Хотын эрх баригчид уг хөшөөг засварт оруулж, түр хугацаанд олон нийтэд үзүүлэхийг зогсоосон байна.

1988 онд зураач Жинн Ринхартын урласан энэхүү хүрэл хөшөө нь Дублин хотын домгийн дүр, дун болон хавч худалдаачин Молли Малоуны дурсгалд зориулсан юм. 2010-аад оноос жуулчдын дунд түүний хөшөөний хөхөнд гар хүрвэл амжилт, аз ирдэг гэх мухар сүсэг дэлгэрч, хүмүүс хөшөөнд хүрч зургаа авахуулах, бүр тэвэрч зургаа даруулах нь ихэсжээ.

Ийнхүү байнгын хүрэлт, даралтаас болж хөшөөний бэхэлгээ сулран, суурийн хадааснууд хугарч эхэлсэн байна. Ирландын “Daily Star” сонинд мэдээлснээр, анхааруулга өгч байсан ч зохих арга хэмжээ цаг тухайдаа хийгдээгүй бөгөөд хөшөө ганхах хэмжээнд хүрсэн тул эцэст нь хамгаалалтын хашаа татаж, засварын ажил эхлүүлжээ.

Мэргэжилтнүүдийн үзэж буйгаар, хөшөөний хугарсан бэхэлгээг шинээр хийж, гадаргууг цэвэрлэн, тосон хамгаалалт хийх юм. Мөн дахин эвдрэл гарахаас сэргийлж, хөшөөг цэцгийн суулгац бүхий хүрээгээр хашихаар төлөвлөжээ. Гэвч энэ арга хэмжээ жуулчдын хэт их сонирхлыг хязгаарлаж чадах эсэх нь тодорхойгүй байна.

Молли Малоуны дүр Ирландын ард түмний хувьд онцгой бэлгэдэлтэй. Түүнийг “Дублины сүлд бүсгүй” гэж нэрлэдэг бөгөөд “Molly Malone” буюу “Cockles and Mussels” хэмээх ардын дуу хотын албан бус сүлд дуу болсон юм. Домгийн ёсоор Молли өдөр нь дун, хавч худалдаж, шөнө нь амьдралаа залгуулахын тулд ажил хийдэг байсан гэж өгүүлдэг.

Хөшөөг анх Графтон-стритэд байрлуулж байсан ч 2014 онд Саффолк-стритэд Жуулчлалын мэдээллийн төвийн өмнө шилжүүлжээ. Тэндээсээ өнөөгийн Дублины хамгийн алдартай аялал жуулчлалын “селфи”-ийн цэгийн нэг болсон бөгөөд хотын бэлгэ тэмдэг болон танигджээ.