Худалдааны танхимд эгшиглэж буй хөгжим нь худалдан авалтын зан төлөвт шууд нөлөөлдөг болохыг олон улсын туршилтууд харуулжээ. Белорусийн FONMIX компанийн захирал Екатерина Хомяк Catman Belarus 2025 бизнес-чуулган дээр энэхүү сэдвийг онцлон ярьсан байна.

Түүний хэлснээр, дэлгүүрт эгшиглэх хөгжмийн төрөл, хэмнэл, темпо нь хэрэглэгчийн дэлгүүрт өнгөрүүлэх хугацаа, худалдан авалтын хэмжээ, сонголтод хүртэл нөлөөлдөг аж. Жишээлбэл:

• 58–72 цохилтын тогтуун хөгжим дэлгүүрт өнгөрүүлэх хугацааг дунджаар 24%-иар уртасгадаг.

• Харин 120–130 цохилттой хурдан хөгжим оргил цагийн урсгалыг хурдасгаж, ачааллыг бууруулахад тусалдаг.

Сонирхолтой жишээ олон бий. Минорын аястай удаан хөгжим хүнийг илүү их худалдан авалт хийхэд хүргэдэг бол дарсны тасагт эгшиглэх сонгодог хөгжим хэрэглэгчийг илүү үнэтэй бүтээгдэхүүн сонгоход түлхэц болдог.

Германы томоохон худалдааны сүлжээ хэдэн жилийн өмнө хулгайн эсрэг өвөрмөц арга хэрэглэж байв. Тэд хөгжмийн нэвтрүүлэгтээ дөнгө, цагдаагийн дуут дохионы богино хэсгийг оруулсны үр дүнд хулгайн тохиолдол 20–40%-иар буурчээ.

Мэргэжилтнүүдийн зөвлөснөөр дэлгүүрийн хөгжмийн дууны түвшин 40–55 децибел-ээс хэтрэх ёсгүй. Чанга хөгжим хэрэглэгчдийг тухгүй болгож, дэлгүүрээс хурдан гарахад хүргэдэг байна. Өглөө, өдөр, оройн цагуудад тус бүр өөр төрлийн плейлист бэлтгэх нь зүйтэй бөгөөд улирал бүрийн уур амьсгал ч хөгжмийн сонголтод нөлөөлдөг.

Үе үеийнхэн өөр өөрийн хөгжмийн таашаалтай. Тэдний хүсэлд нийцсэн хөгжим дэлгүүрийг “өөрийн” мэт мэдрүүлж, дундаж борлуулалтыг нэмэгдүүлдэг. Ялангуяа интернэт, медиаплеертэй өссөн зумер үеийнхэнд хөгжим чухал хүчин зүйл. Тиймээс тэднийг татахын тулд хип-хоп, K-pop, TikTok-д түгсэн хит дуунуудыг плейлистэд оруулах нь худалдаанд ашигтай гэж мэргэжилтнүүд зөвлөж байна.