Шинжлэх ухааны академийн Газарзүй, геоэкологийн хүрээлэн ЮНЕСКО-гийн “Оролцооны хөтөлбөр”-ийн санхүүжилтээр хэрэгжүүлсэн “Монгол Улсын Үндэсний цахим атлас” төслөө олон нийтэд албан ёсоор танилцуулж, нээлтээ хийлээ. Уг цахим атлас нь монголчуудын амьдрал, түүх, соёл, газарзүй, эдийн засаг, хүн ам зүй зэрэг олон талт шинжлэх ухаан-танин мэдэхүйн мэдээллийг багтаасан цогц бүтээл бөгөөд дотоодын төдийгүй олон улсын судлаач, хэрэглэгчдэд зориулсан, нээлттэй хэрэглээтэй мэдээллийн сан болж байна.

Цахим атласаар дамжуулан:

• Монгол орны газар нутаг, байгалийн нөөц, засаг захиргааны бүтэц

• Түүх, соёл, нийгмийн үзүүлэлтүүд

• Хүн ам, эдийн засгийн статистик мэдээллүүд
  зэрэг 132 сэдэвчилсэн зураг, англи-монгол хэлээр танилцуулагдаж байна. Зураг тус бүрд зохиогчийн мэдээлэл, эшлэл авах загвар хавсаргаснаараа онцлог бөгөөд өмнө нь 1990, 2009, 2022 онд хэвлэгдэж байсан үндэсний атласуудын агуулгыг ч тусгасан байна.

Төслийн гол зорилго нь шинжлэх ухааны мэдлэгийг олон нийтэд, олон хэлээр, хүртээмжтэй байдлаар түгээх бөгөөд энэ нь ЮНЕСКО-гийн нээлттэй шинжлэх ухааны талаарх зөвлөмжийг хэрэгжүүлэхэд бодитой хувь нэмэр оруулж байгааг холбогдох албаныхан онцоллоо.

Нээлтийн ажиллагаанд УИХ-ын гишүүн, академич Д.Рэгдэл, ЮНЕСКО-гийн Монголын Үндэсний Комиссын Ерөнхий нарийн бичгийн дарга С.Болдсайхан, ЭЗХЯ, МУИС, УЦУОСМХ-ийн төлөөлөл, нэр хүндтэй эрдэмтэд оролцож, төслийн ач холбогдол, олон улсын жишигт нийцсэн байдлыг онцлон тэмдэглэсэн юм.

Энэхүү цахим атлас нь байршил, нас хүйс, боловсрол, үндэс угсаа, эдийн засгийн боломж бололцоог үл харгалзан бүх хүнд нээлттэй бөгөөд шинжлэх ухаан, боловсролын салбарт шинэ боломжуудыг бий болгохоос гадна олон улсын хамтын ажиллагааг хөгжүүлэхэд ч чухал үүрэг гүйцэтгэнэ.

Ташрамд дурдахад, дэлхийн олон улс орон үндэсний атласаа төрийн бэлгэдлийн нэгэн адил дээдэлж, улс үндэстний бахархал болгон ашигладаг бөгөөд одоогоор 70 гаруй улс үндэсний атластай, 20 орчим улс цахим хувилбартай байна.

Эх сурвалж: ШУА-ийн Газарзүй, геоэкологийн хүрээлэн, ЮНЕСКО.