Япон Улсын Засгийн газрын буцалтгүй тусламжаар “Аll Line Life Net” ТББ, МУБИС-ийн Математик, байгалийн ухааны сургууль хамтран хэрэгжүүлсэн “Байгалийн ухааны боловсролын чадавх, үр өгөөжийг нэмэгдүүлэх” төслийн хүрээнд зохион бүтээж, үйлдвэрлэсэн сургалтын хэрэглэгдэхүүнийг гардуулах ёслол энэ сарын 29-нд Улаанбаатар хотноо боллоо.

МУБИС-ийн Математик, байгалийн ухааны сургуулийн захирал Т.Ганбаатар нээлтийн үеэр хэлэхдээ, “Монгол, Япон хоёр улсын хооронд дипломат харилцаа тогтоосноос хойш 50 гаруй жил болж байна. Өнгөрсөн хугацаанд Японы ард түмэн Монгол Улсын бүхий л салбарт дэмжлэг туслалцаа үзүүлж байсны зэрэгцээ боловсролын салбар, тэр дундаа багш, мэргэжилтний хөгжлийг дэмжих, багшийн арга зүйг хөгжүүлэх зэрэг чиглэлээр маш олон төсөл хөтөлбөрийг хэрэгжүүлсэн.

2011 оноос хойш хэрэгжсэн Монозүкүри төслийн хүрээнд ЕБС-ийн физикийн хичээлийн багаж төхөөрөмжийг зохион бүтээж, түүнийгээ инновац болгон МУБИС-ийн дэргэд гарааны компани байгуулж, тэдгээр багажийг үйлдвэрлэн ерөнхий боловсролын сургуулиудад нийлүүлэх үйл ажиллагаа одоог хүртэл үргэлжилж байна. Тэгэхээр эхний төслийн үр дүн үүгээр илэрч байгаа гэхэд болно.

“Байгалийн ухааны боловсролын чадавх, үр өгөөжийг нэмэгдүүлэх” төслийг хэрэгжүүлэх болсон гол шалтгаан нь байгалийн ухааны гол суурь үндэс бага ангиас тавигдаж байна хэмээн үзсэн. Өөрөөр хэлбэл, бага ангийн багш физикийн багштай хамтран  хүүхдэд гарын доорх материалаар туршилт хичээлийг зохион байгуулах вэ гэдэг арга зүйг олгож байгаагаараа онцлог юм.

Төслийн хүрээнд буюу сүүлийн гурван жилд 9 төрлийн 8400 гаруй сургалтын багаж хэрэглэгдэхүүнийг бүтээж, ерөнхий боловсролын сургуулиудад түгээсэн байна. Мөн “Сонирхолтой туршилтын лаборатори” гарын авлагыг 2000 хувь хэвлэж, Улаанбаатар хотын номын сангууд болон ерөнхий боловсролын сургуулиудад түгээсэн байна. Үүний зэрэгцээ МУБИС-ийн Математик, байгалийн ухааны сургуульд 6 удаагийн сургалтыг зохион байгуулж, 120 ерөнхий боловсролын сургуулийг хамрагдаж сургалтаар эзэмшсэн багаж хэрэглэгдэхүүнийг ашиглаж байна.

Үүний зэрэгцээ орон нутаг дахь ерөнхий боловсролын сургуулиудад энэхүү сургалтыг явуулж, бага ангийн болон физикийн 260 багшийг хамруулж, төдий тооны багаж хэрэглэгдэхүүнүүдийг гардуулсан. Ингэхдээ нэг сургуулийн 300 хүүхдийг хамруулсан фестивал зохион байгуулдаг. Фестивалын үеэр хүүхдүүд гарын доорх материалаар туршилтыг хэрхэн хийх талаар багш нар маань зааж, хүүхдүүд хийсэн бүтээлээ гэртээ авч харьдаг. Гарын доорх материалаар туршилт хийж, түүнийхээ учрыг нь олсон хүүхдүүдийн нүд нь гэрэлтэж, туршилтын хичээл гэж ийм гоё юм байдаг гэдгийг мэдэрдэг нь их чухал.

Сүүлийн хоёр жилд төслийн багийн гишүүд жил бүр Сүхбаатарын талбайд болдог Японы ЭСЯ-наас зохион байгуулдаг “Япон фестиваль”-д оролцож, төслийнхөө үр дүнг танилцуулж, гарын доорх хэрэглэгдэхүүнүүдийг хүүхдүүдэд тарааж, байгалийн ухааныг шинжлэх ухааныг сурталчилж буй” гэлээ.

Япон Улсаас Монгол Улсад суугаа ЭСЯ-ны хоёрдугаар нарийн бичгийн дарга Харука Кёока, “Японы Засгийн газрын төрийн бус байгууллагуудтай хамтран хэрэгжүүлэх буцалтгүй тусламжийн хүрээнд “Аll Line Life Net” ТББ нь МУБИС-тай түншлэн, Монгол Улсын байгалийн ухааны боловсролын чанарыг сайжруулах, бүтээлч ур чадвар бүхий хүний нөөцийг бэлтгэхэд хувь нэмрээ оруулахаар ажиллаж ирсэн юм. Тодруулбал, 9 орчим жилийн хугацаанд 3 үе шаттайгаар төсөл хэрэгжиж, бага дунд ангийн сурагчдад зориулсан байгалийн ухааны хичээлийн сургалтын хэрэглэгдэхүүнийг боловсруулан тараах, багш нарт заах арга зүйн сургалт зохион байгуулах зэрэг ажлыг хийж ирсэн билээ. Энэ жил 3 дахь шатны төслийн сүүлийн жил бөгөөд сургалтын хэрэглэгчдийг хүлээн өгөхийг хүлээлгэн өгөх ёслол нь өдий хүртэлх үйл ажиллагааны нэгэн чухал үр дүн болж байна.

Монгол Улсын Засгийн газраас 2026 оныг Боловсролыг дэмжих жил болгож, боловсролын салбарыг цаашид улам сайжруулж, тогтолцоог бэхжүүлэхэд анхааран ажиллаж байгаа билээ. Иймд энэхүү төслөөр дамжуулан боловсролыг дэмжихэд бага ч болов хувь нэмрээ оруулж чадвал бидний хувьд туйлын нэр төрийн хэрэг болох юм. Сурган хүмүүжүүлэгч та бүхний хүчин чармайлтаар монгол хүүхдүүд өндөр боловсрол эзэмшиж, төслийн үйл ажиллагаагаар дамжуулан Монгол Улсын ирээдүйн хөгжлийг түүчээлэх шилдэг боловсон хүчин болж, төрөн гарна гэдэгт найдаж байна” хэмээв.

Төслийн Ерөнхий зохицуулагч Кидокоро Такуо тус үеэр хэлэхдээ, “Би анх 1972 оны 9 дүгээр сарын 28-нд Монголд хөл тавьж байлаа. Сүүлд 2009 онд намайг Элчин сайдаар ажиллаж байх үед төслийн талаарх санал гарч, төсөл маань албан ёсоор 2011 оны 9 дүгээр сараас эхэлж байв. Өнөөдөр бид сүүлийн сургалтын хэрэглэгдэхүүнээ тарааж байна. Энэхүү төсөл олон хүний тусламж дэмжлэгээр өдийг хүртэл үргэлжилсэн гэлгийг онцлох хэрэгтэй. Өнгөрсөн оны 6 дугаар сард  Боловсролын сайдаар П.Наранбаяр ажиллаж байсан. П.Наранбаяр сайдтай уулзахад уг төслийг үргэлжлүүлэх хүсэлтээ байгаагаа илэрхийлсэн вм. Тиймээс тэрхүү хүсэлтийг бид хүлээн авч, Гадаад явдлын яаманд уламжилсан. Сургалтын хэрэглэгдэхүүн гардаж авч буй багш нар маань Монголын ирээдүй болсон хүүхдүүдэд илүү чанартай сургалтыг хүргэнэ гэдэгт итгэлтэй байна” гэв.

Нээлтийн ёслолын дараа төслийн удирдлагууд, мэргэжилтэн багш нар ЕБС-иудын багш нар сургалтын хэрэглэгдэхүүн болон номыг хүлээлгэн өглөө.