Хөвсгөл аймгийн Нэгдсэн эмнэлгийн нүдний тасаг нүдний болор солих мэс заслыг орон нутагтаа амжилттай хийж эхэлжээ.
Нүдний их эмч М.Жавзандулам өнгөрсөн оны 7 дугаар сард Бангладеш улсад болор солих мэс заслын чиглэлээр онол, дадлага хосолсон нарийн мэргэжлийн сургалтад хамрагдаж, улмаар орон нутагтаа уг мэс заслыг хийх боломж бүрдсэн байна. Ингэснээр тус эмнэлэг өнгөрсөн оны 9 дүгээр сараас эхлэн нийт 25 хүнд болор солих мэс заслыг амжилттай хийгээд байна.
Нүдний их эмч Ж.Жавзандулам, “Орон нутагтаа болор солих мэс заслыг нутагшуулах зорилготой ажиллаж байна. Нүдний болор солих мэс засал нь үндсэндээ хоёр төрлийн арга байдаг бөгөөд бид одоогоор болор хатуурч биежсэний дараа бүхлээр нь авч солих аргыг хэрэглэж байна. Цаашид эхний ээлжид 100-150 хүнд энэ аргаар мэс засал хийхээр төлөвлөж байгаа бөгөөд дараагийн шатанд тусгай тоног төхөөрөмж ашиглан хийдэг дэвшилтэт аргыг нэвтрүүлэхээр зорьж байна.
Мөн мэс заслын үр дүн тухайн хүний биеийн ерөнхий байдал, нүдний угийн өөрчлөлт, архаг өвчнөөс шалтгаалан харилцан адилгүй байдаг ч хүндрэлгүй тохиолдолд хараа 80-90 хувь, зарим тохиолдолд 100 хувь хүртэл сайжрах боломжтой. Болор солих мэс засалд орсон нэг иргэн өмнө нь 1 хувиас бага хараатай байсан бол хагалгааны дараа 90 хувь хүртэл сайжирсан зэрэг бодит үр дүн гарч байна" гэж ярилаа.
