“Хөдөө аж ахуйн корпорац” ТӨХХК 2026 оны хаврын тариалалтын ажлын хүрээнд үрийн улаан буудай, төмс, хүнсний ногоо, тэжээлийн болон сэлгээний таримлын үр болон ургамал хамгааллын бодис, хөдөө аж ахуйн техникийн борлуулалтыг зохион байгуулж байна.

Үрийн улаан буудайн нөөц бүрдүүлэлт, борлуулалт

Тусгай зөвшөөрөлтэй аж ахуйн нэгжээс зургаан төрлийн нутагшсан сортын 7.338.0 тонн үрийн улаан буудай худалдан авч нөөц бүрдүүлсэн ба өмнөх оны үлдэгдэл нөөц 3.306.0 тонн, нийт 11.8 мянган тонны нөөц бүрдүүлжээ. Энэ нь нийт 88.7 мянган га талбайд тариалалт хийх хэмжээний үрийн улаан буудай юм.

Улаан буудайн үрийг нэгдүгээр сарын 15-наас эхлэн долоо хоног бүрийн пүрэв гарагт Хөдөө аж ахуйн биржийн арилжаагаар олон нийтэд ил тод, нээлттэй худалдан борлуулж байна. Өнөөгийн байдлаар 23 удаагийн биржийн дуудлага худалдаа зохион байгуулж 280 тариаланч иргэн, аж ахуйн нэгжид 15 хувийн урьдчилгаа төлбөртэй зээлээр олгожээ. Хувийн хэвшлийн хөрөнгө оруулалтаар ОХУ-аас 2000 тонн элит үрийн улаан буудай нийлүүлэн, компанийн “Хөтөл” салбараас олгож байна. Импортын элит үрийг биржийн арилжаагаар оруулахгүй шууд худалдан борлуулж, урьдчилгаа 30 хувийн төлбөр төлөөд зээлээр авах боломжийг бүрдүүлжээ.

Ургамал хамгааллын бодис, бордооны нийлүүлэлт, хангалт:

2026 оны тариалалтад шаардлагатай ургамал хамгааллын бодис, бордооны нийлүүлэлтийг импортын тусгай зөвшөөрөл бүхий аж ахуйн нэгжүүдтэй хамтран ажиллах гэрээний хүрээнд зохион байгуулж, тариаланчдад намрын ургацаараа эргэн төлөх нөхцөлтэй дамжуулан зээлээр олгох ажлын бэлтгэлийг бүрэн хангаад байна.

2026 оны тариалалтад зориулан 21 импортын тусгай зөвшөөрөл бүхий аж ахуйн нэгжийн 3.6 тэрбум төгрөгийн ургамал хамгааллын бодис, 20.0 тэрбум төгрөгийн 8600 тонн бордоо дамжуулан зээлийн үйлчилгээгээр борлуулах төлөвлөгөөтэй ажиллаж байгаа аж.

Өнөөдрийн байдлаар давхардсан тоогоор 99 иргэн, аж ахуй нэгжид 10.560 тонн/литр эрдэс бордоог 9.6 тэрбум, 18 аж ахуй нэгжид 2.590 литр үр ариутгал, тариалалтын өмнөх болон ургалтын үеийн хог ургамлын эсрэг ургамал хамгааллын бодисыг 165.3 сая төгрөгөөр борлуулаад байна.

Төмс, хүнсний ногооны үрийн хангалт нийлүүлэлт:

Үрийн төмс нийлүүлэгч дөрвөн аж ахуйн нэгжтэй 3500 тонн нийлүүлэх дамжуулан зээлийн хамтран ажиллах гэрээ байгуулсан ба үүнээс 1200 тонн нийлүүлэлт хийж өнөөдрийн байдлаар 296 тонн үрийн төмс 19 тариаланч иргэн, аж ахуйн нэгжид худалдан борлуулаад байна.

ХХААХҮСайдын 2026 оны А/165 дугаар тушаалаар нийт 600 сая төгрөгийн үнэ бүхий хүрэн манжин, шар лууван, байцааны үрийг худалдан борлуулж ажиллах үүргийн дагуу гурван төрлийн хүнсний ногооны үрийг хүлээн авч долоон салбарт байршуулан, бүсчилсэн хэлбэрээр зээлээр олгож байна.

Тэжээлийн болон сэлгээний таримлын үрийн нийлүүлэлт, борлуулалт:

Дамжуулан зээлийн үйлчилгээгээр тэжээлийн болон сэлгээний таримлын үрийн нийлүүлэх таван аж ахуйн нэгжтэй хамтран ажиллах гэрээ байгуулан долоон төрлийн таримлын үр худалдан борлуулж байна.

Өнөөдрийн байдлаар овьёосны үр 840 тонн, вандуйн үр 3 тн, арвайн үр 20 тонн, эрдэнэ шишийн үр 600 кг, тосны ургамлын үр 3.1 тонн худалдан борлуулаад байгаа ажээ.