“Уур амьсгалын өөрчлөлтийн нөхцөл дэх мал аж ахуйн үйлдвэрлэлийг эрхлэх арга технологийг сайжруулах асуудал” сэдэвт олон улсын эрдэм шинжилгээний бага хурал 5 дугаар сарын 6-нд болно.

Энэхүү хуралд Монгол Улс болон БНХАУ, Швейцарь, Канад улсын эрдэмтэн, судлаачид оролцох бөгөөд бэлчээр ба нүүдлийн мал аж ахуй эрхлэгчдийн олон улсын жилийн хүрээнд болох аж.

Мөн хүлэмжийн хийн ялгаралт, түүнийг бууруулах арга зам, бэлчээрийн малын генетик нөөц, уур амьсгалын өөрчлөлтийн нөлөөн дэх бэлчээрийн экосостемийн өөрчлөлт, хөрсний органик нүүрстөрөгчийн шингээлт, мал аж ахуй эрхлэх арга туршлага, малчдын залгамж халаа, тэжээлийн олон наст буурцагт ургамлыг тариалах, туршлага, шинэ төрлийн тэжээлийн малын ашиг шимд үзүүлж буй нөлөө, малын гаралтай бүтээгдэхүүний чанар, үнэлгээ зэрэг 40 гаруй сэдвийн хүрээнд илтгэл хэлэлцүүлнэ.

Тус хуралд Канад улсын Саскачеваны Их Сургуулийн Тариалангийн хөгжлийн төвийн судлаач, эрдэмтэн Билигэтү Билл, Швейцарын халуун орны болон нийгмийн эрүүл мэндийн хүрээлэнгийн судалгааны хэлтсийн судлаач Якоб Зинсстаг, БНХАУ-ын Ланжоугийн их сургуулийн багш, судлаач Лонг Руйжун, Өвөр Монголын Хөдөө аж ахуйн их сургуулийн бэлчээрийн шинжлэх ухааны коллежийн багш, судлаач Ли Жигуо нар оролцох юм.

Түүнчлэн тус сургуулийн Хээрийн шинжлэх ухааны коллежийн багш, судлаачид зэрэг олон улсын их сургууль, судалгааны хүрээлэнгийн эрдэмтэн, судлаачид болон ХХААХҮЯ, харьяа байгууллага, ХААИС, МУИС болон Эрдэм шинжилгээний хүрээлэнгүүдийн судлаачид оролцож, илтгэл хэлэлцүүлнэ.